Rokstu sagataveja: portals lakuga.lv

Bīdreiba “Vuolyudzeite” kūpā ar dzīšmu kūpu “Prīkam i spākam” da 2025. gods 23. juļa aicynoj Rēzeknis nūvoda folklorys kūpu vadeituojus, daleibnīkus i vysus, kurim pateik dzīduot i muzicēt, pīsasaceit tradicionaluos uora dzīduošonys meistarklasem Feimaņūs. 

Rēzeknis nūvoda Feimaņu pogosta bīdreiba “Vuolyudzeite” kūpā ar Feimaņu pogosta dzīšmu kūpu “Prīkam i spākam” ir aizsuokuse eistynuot projektu “Dzīduošonys i muziciešonys prašmu styprynuošona Rēzeknis nūvodā”. Projekta mierkis ir atteisteit, pylnveiduot i styprynuot Rēzeknis nūvoda dzeivuotuoju izpratni, zynuošonys i prasmis kulturizgleiteibys laukā. Projektā paradzātys treis meistarklasis – divejis veļteitys tradicionalajai uora dzīduošonai, sovpus vīna tradicionalajai kūkļuošonai. Meistarklasis nūtiks Rēzeknis nūvoda Feimaņu pogosta kulturys nomā i Feimaņu apleicīnē. 

Par ideju eistynuot taišni uora dzīduošonys apvuiceibys projekta vadeituoja i dzīšmu kūpys vadeituoja Kristīne Zeltiņa stuosta: “Jau divejis godus vodu Feimaņu folklorys kūpu “Prīkam i spākam”. Ar dzīduotojom izdūmuojom, ka gribim vaira pasavuiceit. Tai kai mums cīši pateik grupa “Saucējas” i jūs skaniejums, uzrunuojom Ivetu Tāli, kura beja ar mīru meistarklašu vadeišonai. Projekts ir na tik mums pošim, bet ari vysom cytom Rēzeknis nūvoda folklorys kūpom, i asam prīceigi, ka Rēzeknis nūvodā ir koč kaida jauna vēsme itamā sferā.” Kristīne poša vuicās spieļuošonu iz kūklis, deļtuo jai beja aktuali nūorganizēt ari kūkļuošonys meistarklasi.

Tradicionaluos uora dzīduošonys īvods (telpuos) nūtiks 2025. gods 27. julī nu 13 da 17.30 Feimaņu kulturys nomā, sovpus 3. augustā nu 13 da 17.30 nūtiks uora dzīduošona dobā Feimaņu apleicīnē.

Meistarklašu vadeituoja folkloriste Iveta Tāle pietejuse dobā dzīduošonys tradiceju i praktiziejuse tū ar tradicionaluos dzīduošonys grupu “Saucējas”. Uzkruotuos zynuošonys i pīredze ļuovuse sacynuot, ka dobai kai akustiskai telpai latvīšu dzīduošonys tradiceju kontekstā ir pamateiga nūzeime.

Interese par Laurys Laugalis meistarklasi 17. augustā, kas tiks veļteita tradicionalajai spieļuošonai iz kūklis, ir bejuse lela, deļtuo pīsasaceišona ir nūsaslāguse. 

Anketa uora dzīduošonys meistarklasei: https://forms.gle/X95m7C7joT 8Dov3V9 

Papildinformaceja pa telefonu 29337355.

Projektu “Dziedāšanas un muzicēšanas prasmju stiprināšana Rēzeknes novadā” (Nr.24-01-CL19-C0LA19.2204-000005)” pabolsta bīdreiba “Rēzeknis nūvoda partnereiba” i Maltys apvīneibys puorvaļde.