Rokstu sagataveja: portals lakuga.lv

9. augustā Bolvu nūvoda Bierzpilī piec leluokys pauzis jau ūtrū godu otkon nūteik pasuokums “Dziesma Bērzpilī”, kurū var skaiteit ari par grupys “Ginc un Es” rasšonuos suokumu. Augusta pyrmajā nedeļā ar sovim īsacejumim, kū vēļ īspēt sadareit vosorys pādejā mienesī, pasadola grupys daleibnīks i ituo pasuokuma vīns nu organizatoru Gints Ločmelis. Jis īsoka atbraukt gostūs iz pasuokumu, paraudzeit sagiut zivi Rāznā voi augusta golā dūtīs iz lelkoncertu Latgolys sirdī – Rēzeknē.

Sasatikt Bierzpilī i apsavīnuot dzīsmē

Pasuokums nūteik jau nu 1997. gods, kod bejušajai grupys daleibneicai Sarmai Rakstiņai roduos ideja, ka Bierzpilī varātu sasatikt i kūpā uzastuot nav tik profesionali muziki, bet vysi, kam pateik dzīduot. Īrosti pasuokuma pyrmajā daļā ir daleibnīku koncerts, kurū ari viertej žureja, tok piečuok nūteik balle. 

Kaidu laiku “Dziesma Bērzpilī” nanūtyka, tok jau ūtrū godu asam atjaunuojuši itū tradiceju, kurys ideja aizviņ ir dzeiva – sasatikt Bierzpilī i apsavīnuot dzīsmē. Tei ir vareiba redzēt vīnam ūtru i byut kūpā na tik, pīmāram, iz kopusvātkim. Prīca, ka ir lela daleibnīku i apmaklātuoju atsauceiba.

Mokšoruošona i “Rāznas brekši”

Mani cīši saista zyvu giušona, deļtuo īsoku aizbraukt iz Rāznu pi “Rāznas brekšu” saiminīka Juoņa Kuprys, kurs ir breineigs azara gids. Ka kaids tū vēļ nav itamā vosorā izdarejs, aicynoju tū īspēt padareit. Voi ari vīnkuorši aizbraukt iz Rāznu – atsapyust i izbaudeit lobū laiku. 

Satikt grupu “Ginc un Es” lelkoncertā Rēzeknē

Rēzeknis piļsātys svātki jau nūsvieteiti, tok vosorys koncertu sezona piļsātā vēļ nav golā. 23. augustā aicynoju apmeklēt lelkoncertu “Sadziedam Latgalē” Rēzeknis Kulturys i atpyutys parkā, kur varēs satikt ari myus – grupu “Ginc un Es”. Dūmoju, ka tys byus jauks pasuokums, kurā sasatiks muziki nu vysu Latvejis nūvodu.