Rokstu sagataveja: portals lakuga.lv

Pīktdiņ, 26. septembrī, 10 stuņdēs Bolvu Centraluo biblioteka aicynoj iz seminaru kulturys darbinīkim, kurā ar sovim pietejumim par Latgolu pasadaleis pietnīki nu RTU Rēzeknis akademejis i Latvejis Universitatis (LU) Literaturys, folklorys i muokslys instituta. 

Seminarā “Latgales patība/identitāte pētījumos” nu LU Literaturys, folklorys i muokslys instituta pīsadaleis vodūšais pietnīks Aigars Lielbārdis ar pietejumu par buramvuordu tradicejom Latgolā i vodūšais pietnīks Sandis Laime ar pietejumu par rogonu prīškstotu daudzveideibu Latvejā i Latgolā. Ar stuostejumu par latgalīšu folkloru Latvīšu folklorys kruotivis digitalajā arhivā garamantas.lv uzastuos RTU Rēzeknis akademejis asociātuo profesore i vodūšuo pietneica Angelika Juško-Štekele. Sovpus folklorys pietnīks Guntis Pakalns stuosteis par stuostnīceibys lītuošonu bibliotekuos namaterialuo kulturys montuojuma saglobuošonā i aktualiziešonā. 

Par itaida veida seminaru nūzeimi i par īpazeistynuošonu ar pietnīceibys rezultatim stuosta vīns nu seminara daleibnīku, vodūšais pietnīks Sandis Laime: “Koč i zynuotnīki veic daudz i vysaidus pietejumus vysūs Latvejis regionūs, pietejumu rezultati na vysod sasnādz sabīdreibu, taidā ceļā nasaveidoj atgrīzeniskuo saite pietnīku i sabīdreibys vydā. Koč ari juosoka, ka pādejā laikā atgrīzeniskuos saitis veiduošona ir obligats pietnīcyskuo procesa prīšknūsacejums.” Sandis pīzeist, ka vysod ir prīceigs, kod teik aicynuots stuosteit par sovim pietejumim bibliotekuos, kulturys nomūs i cytur, deļtuo ka skaita – pietnīki vītejom kūpīnom var paleidzēt apzynuot vierteiguos i unikaluos sova montuojuma lītys. Vaicuots, voi ir bejs kaids seviškys atkluojums taišni saisteibā ar Zīmeļlatgolu, kurā itūreiz nūteik seminars, Sandis atbiļd, ka eipaša pīredze jam bejuse Viļakys apleicīnē: “Pyrma desmit godu, vuocūt datus sovai doktora disertacejai par arhaiskū nakts rogonu tradiceju, kas da 20. godu symta vyda beja sasaglobuojuse Zīmeļvydzemē i Zīmeļlatgolā, tyku ari da Ilzeņu Rogonu kolna, kas atsarūn Bolvu nūvodā storp Viļaku i Semenovu (Medņovu). Tī stuosti par kolna rogonom, kas cytur ir pagaisuši, ir sasaglobuojuši da pat myusu dīnu. Folkloristam tei ir eipaša sajiuta – pietejūt tradiceju, kas it kai jau ir pagaisuse, atrast nalelu saleņu, kur senejī stuosti aizviņ ir dzeivi. Dūmoju, ka Latgolys cylvāki vys vēļ globoj daudz itaidu vēļ naapzynuotu vierteibu.”

Seminars nūtiks Bolvu muižā (Breiveibys īlā 47). Taipat tam varēs sekuot leidza ari Bolvu Centraluos bibliotekys Facebook kontā. Seikuoku pasuokuma programu var apsavērt ITE.

Seminaru organizej RTU Rēzeknis akademeja sadarbeibā ar Bolvu Centralū biblioteku.