Kulturys īsacejumi nedeļai: ekspediceja latgalīšu pavuordēs, latgaliskais džezs i recepti
Rokstu sagataveja: portals lakuga.lv
Kulturys īsacejumus rudineigim vokorim sagatavejuse bejušuo portala lakuga.lv redaktore i latgaliskūs projektu vadeituoja Vineta Vilcāne-Toca. Itamā reizē īsacejumi, kurūs var pīdzeivuot, pat naizejūt nu sātys.
Paraudzeit kaidu receptu nu pyrmuos povuoru gruomotys latgaliski
Rudiņs atguojs, pogrobūs, kambarūs i klietīs sanasti vysaidi lobumi, koč ari itūgod buļbu raža bejuse mozuoka nakai cytus godus, tok nav nikuo lobuoka par poša izaudzātu. I laiks vysus lobumus likt iz golda! Īsoku iztaiseit kaidu gordu iedīni nu pyrmuos povuoru gruomotys latgalīšu volūdā – Antoninys Masiļūnis 1992. godā izdūtuos “Povōru grōmotas”. Tamā atrūnams ap 400 recepšu, te vys juoatzeimoj, ka tī ir “modernī iedīni”, na senejī, latgalīšu zemnīku vyrtuvei rakstureigī, kuri pīfiksāti vysaiduos etnografiskuos ekspedicejuos.
Koč ari itei gruomota sovulaik izdūta 15 tyukstūšuos eksemplaru, niu palykuse par bibliografisku ratumu. Tok nav par kū bāduot – pi receptu var tikt. 2022. godā itei gruomota, īkļaunūt receptus izlasis veidā, tyka puorizdūta jaunā izskotā, i tū var puorskaiteit elektroniski bez moksys ITE. Sovpus, ka gribīs vaira dazynuot par A. Masiļūni i povuoru gruomotu, var puorskaiteit rokstu nu lakuga.lv arhiva.
Ekspediceja latgalīšu pavuordēs
Garajūs rudiņa vokorūs īsoku laistīs latgalīšu pavuoržu “ekspedicejā” – īsavērt Ilmāra Meža gruomotā “Latviešu uzvārdi arhīvu materiālos. Latgale”. Gruomotā var puorskaiteit viesturnīku rokstus par latgalīšu pavuoržu dūšonu i atrast gondreiž 4000 latgalīšu uzvuordu sarokstu, tim dūts izplateibys areals i nūzeimis skaidruojums. Saistūši var byut izzynuot na tik sovys pavuordis izaceļšonu, tok ari rodu i draugu. Itaida poša gruomota izdūta ari par latvīšu uzvuordim cytūs Latvejis nūvodūs.
Nūsaklauseit Māra Briežkalna kvinteta albumu “Latgalian Evergreens”
Ka gribīs latgalīšu muzyku izbaudeit cytaižuokā – džeza – skaniejumā, īsoku nūsaklauseit Māra Briežkalna kvinteta albumu “Latgalian Evergreens”. Albumā var atrast taidys Latgolys muzykaluo montuojuma pērlis kai “Auga, auga rūžeņa”, “Kūkleitis skanēja”, “Aiz azara malni meži” i cytys.
