Rokstu sagataveja: portals lakuga.lv

Rudiņs atguojs ar vysaidim jaunumim ari latgaliskuos muzykys sferā. Portala lakuga.lv skaiteituojim itūreiz pīduovojam nūsaklauseit kai pavysam tradicionala skaniejuma skaņdorbus i smoguos folkmuzykys jaunumu, tai tautysdzīsmis ar repa elementim voi akustiskā gitarys izpiļdejumā.

Izguojuse etnomuzykys izlase “Sviests 11”

Jaunuokajā etnomuzykys izlasē “Sviests 11”, kurū tikū izdavuse studeja “Lauska”, 19 skaņdorbu vydā atrūnamys ari divejis dzīsmis latgaliski. Izlase jau vaira nakai 20 godu apvīnoj vysaidus tautys muzykys i postfolklorys muokslinīkus i ir sova veida skaņu ceļuojums cauri vysai Latvejai – nu tradicionala skaniejuma da eksperimentalim skaņdorbim.

Izlasē īkļauta folklorys kūpys “Upīte” dzīsme “Gonu reps”, kas, kai viestej kūpys vadeituojs Andris Slišāns, ir cīši folklorys kūpai rakstureigs skaņdorbs – taids, kurā sasateik tautysdzīsmis spāks, latgaliska ironeja i šudiņdīnys energeja. Dzīsme stuosta par ganeņu, kas īt sovu ceļu i napasadūd, stuojūtīs preteimā gryuteibom. Tamā sasavej burdons, reps i dabiskys lauku skaniejums.

Taipat izlasē īkļauta latgalīšu tautysdzīsme “Tymseņš guoja”, kurū izpylda trio “Bille” – dzīduotuojis i muzykantis Liene Skrebinska, Anna Patrīcija Karele i Katrīna Karele.

Mārča Auziņa jaunajā albumā ari tautysdzīsme “Auga, auga rūžeņa”

Muziks, komponists i gitarists Mārcis Auziņš izdevs jau septeitū studejis albumu “Latviešu dziesmas solo ģitārai”, kurā apkūpuoti 11 skaņdorbi. Tūs vydā ari latgalīšu tautysdzīsme “Auga, auga rūžeņa”. Mārcis Auziņš stuosta, ka albums ir dabiskys turpynuojums ar taidu pošu nūsaukumu izdūtajai notu gruomotai dzīsmem, kurys jam ruodejušuos na viņ izcylys melodejis, tok ari pateiceigys izpiļdeišonai solo gitarys žanrā, eipaši juo izkūptajam fingerstyle gitarys spieļuošonys pajiemīnam.

Folkmetala grupai “Varang Nord” jauna dzīsme “Vylku bors”

Folkmetala grupa nu Daugovpiļs “Varang Nord” gatavej jaunu albumu i turpynoj izdūt singlus. Dzīsme “Vylku bors”, kurys vuordu i muzykys autori ir Maksims Popovs, Jelena Kalniša i Jurijs Borins, stuosta par senejūs mežu pasamūsšonu, pūru tymsys pagaisšonu i aicynoj nazaudēt spāku, pasaļaunūt ceiņā iz vylku boru. 

Etnomuzykys grupa “Folkvakars” īrakstejuši albumu “Danči”

Etnomuzykys grupa “Folkvakars”, kurys sastuovā itūšaļt ir Kristīne Kārkle-Kalniņa, Edgars Kārklis, Gatis Valters, Krišjānis Putniņš i Artis Orubs, īrakstejuši jaunu albumu “Danči”. Tymā atrūnamys taidys tradicionalys daņču melodejis kai “Krakovjaks”, “Pankūkas” i cytys. Albumā ari diveji skaņdorbi latgaliski – “Ceiruļs olu dora” i “Dzīsme” aba “Dzīduot muoku, doncuot muoku”.