Niu, kod laiks aiz lūga arviņ bīžuok atguodynoj par tū, ka vosora tyvojās sovam pādejam akordam i ka cīši dreiži syltums byus juomeklej pi kuorteigys čaja skrūzis, capurē i cymdūs, par sirds i dvēselis syltuma saglobuošonu pasaryupej grupa „Borowa Mc”, kas klauseituojim prezentej sovu jaunū dzīsmi „Aizlaid pa viejam”.

Piec pusūtra goda radūšuos pauzis klauseituojus ar sovu jaunū dzīsmi otkon prīcej latgalīšu grupa „Borowa Mc”. Saprūtūt, ka vēļ tik daudzi kas nav pascēts i ka vēļ tik daudzi kas iz sirds, muziki radeja dzīsmi par mīlesteibu – tū, piec kurys kotrs nu mums, apzynuoti ci nā, snādzas. Dzīsme „Aizlaid pa viejam” stuosta par tom naatkuortojamom sajiutom, kū izdzeivoj kotrs, kas mīļoj i teik mīļuots. Par itū boguoteibu, kas nav izmierejama nivīnā pasauļa valutā, nu ir tik labi pazeistama kotram. Nav svareigi, kur – Tokejā, Moskovā, Ņujorkā ci itepat – Preiļūs. Nasabeit pasadūt itom jiutom – taids ir ituos dzīsmis viestejums.

Dzīsmis muzykys autore ir Guntra Kuzmina, nu teksta autors ir Aigars Runčis.

Grupa „Borowa Mc” tyka dybynuota 2004. godā Rēzeknē, popularitati klauseituoju vydā dabuoja ar dzīsmi „Vysskaituokajai meitinei”, kas 2005. godā īsarynduoja radejis SWH topa augšgolūs, kai ari īgiva SWH i Latvejis Radejis 2 „Muzykaluos bankys” 2005. goda popularuokuos dzīsmis titulu. Grupa ir izdavuse 3 studejis albumus, kurymūs ir dzīsmis, kuru topšonā pīsadaleja ari daudzi Latvejā pazeistami muziki.
.