Rokstu sagataveja: portals lakuga.lv

Oktobra gola kulturys īsacejumus pīduovoj Bolvu nūvoda Bierzpiļs pogosta bibliotekare, gide i folklorys kūpys “Saivenis” dalineica Anna Kriviša. Anna ir Latgolys i seviški sovys dzymtuos pusis patriote. Veļu laikā jei aicynoj aizadūmuot par dzymtys vierteibom, pīsadaleit saļmu dzīduošonā, aizlyudzūt par sovim aizguojušajim meilajim, i vaļsts svātku mienesī – novembrī – īsoka pasacīmuot Bolvu nūvodā, kur nūtiks vysaidi pasuokumi. 

Pīsadaleit saļmu dzīduošonā

Oktobra beigys i novembra suokys leidz Muortenim ir veļu – klusuma, mīra i atceris – laiks, kod nūteik myrušūs pīminis pasuokumi. Latgolā aizviņ dzeiva ir saļmu dzīduošonys tradiceja. Bolvu nūvods ir spieceigs ituos tradicejis nesiejs i globuotuojs. Ari Bierzpilī sīvys jau daudzus godus īt kūpā i ar dzīduošonu aizlyudz par sovim myrušajim. Saļmu dzīduošona nūteik Bierzpiļs Saīta nomā. Šymūs dzīduojumūs var pīsadaleit vysi, kuri grib gūdynuot sovus myrušūs, i ari tī, kuri grib pasavuiceit saļmu dzīduošonā. Braucit da Bierzpiļs koč voi nu Reigys! 

Pīraksteit dzymtu stuostus

Tymsajūs novembra vokorūs aicynoju satikt tyvinīkus i saimis lūkā pajimt rūkā fotografeju albumus, caur biļdem atguoduot sovu dzymtu stuostus, pīraksteit i saglobuot tūs. Daudzi aizīt viņsaulē, stuosti palīk naizstuosteiti. Itys aicynuojums ir ari ļaudim, kurim saknis Bierzpiļs pogostā, bet kuru senči sovā laikā nu tuo izceļuojuši. Bierzpiļs biblioteka lobpruot papyldynuotu nūvodpietnīceibys materialus ar interesantim dzymtu stuostim i fotografejom.

Vaļsts svātku mienesī apmeklēt Bolvu nūvodu

Novembris ir ari vaļsts svātku mieness. Braucit da Bolvu nūvoda! Jauks pasuokums 9. novembrī byus Ruguojūs, kur Ruguoju katuoļu bazneicā nūtiks aizlyugums par Ruguoju jauktuo kora dybynuotoju, ilggadejū dirigentu i skūluotuoju, Atzineibys krysta kavaleri Pīteri Sudarovu. Piec Sv. Misis varēsit pabyut pīminis koncertā “Ar dzīsmi myužeibā…”, kas veļteits P. Sudarova 95. dzimšonys dīnai. Voi vaļsts svātku prīškvokorā, 15. novembrī, atbraucit iz Bierzpiļs Saīta nomu, kur ar sirdspatikšonu i humoru Danskovītis komedeju “Vyss, kas nūteik, nūteik iz lobu” izspieļuos gosti nu Rēzeknis nūvoda – Dekteru amaterteatris.

Gruomota tymsim rudiņa vokorim

Rudiņa vokori kai radeiti gruomotu laseišonai. Ar gruomotom, taipat kai ar iedīni – kotram sova gaume. Vys grybātu īsaceit fraņču rakstneicys Valerejis Perēnys romanu “Svaigs ūdens puķēm”. Gruomota par zaudejumim i kai tūs puordzeivuot. Tys ir gaiši pīraksteits viestejums par stypru sīvīti. Romanā atrassit kai mīlesteibu, tai detektivu.