Rokstu sagataveja: portals lakuga.lv

Kruoslovys nūvoda Laimis muzejā nūsasliedzs projekts “Laimīgi Indrā – laimīgi Latgalē”, kura mierkis ir styprynuot dzeivuotuoju pīdareibys sajiutu Latgolys regionam i Latvejis vaļstei, taipoš ari popularizēt latgalīšu volūdu publiskajā telpā. Tuo rezultatā niu muzeja ekspozicejuos daīmams ari teksts latgaliski.

Ideja tulkuot muzeja informacejis pluoksnis latgaliski pīdar tuo vadeituoja Ilonai Kangizerei. “Pa munam turysma vītai, kas atsarūn Latgolā, ir pīnuokums izmontuot ari latgalīšu volūdu sovūs informativajūs stendūs i bukletūs. Daudzi Latvejis dzeivuotuoji brauc iz myusu pusi taišni deļ Latgolys šarma i unikalitatis, i kas var byut vēļ unikaluoks par sovu volūdu. Niu Laimis muzejs i sūpluok asūšuo pastaigu styga ir pyrmuos publiskuos vītys Indrā, kur daīmama informaceja latgalīšu volūdā. Tei ir muna apzynuota gribiešona veicynuot vītejū patriotismu i, nasaverūt iz tuo, ka Indrys pogostā puorsvorā ir krīvvolūdeiga vide, paruodeit, ka Indra ir naatjamama Latgolys i Latvejis daļa,” tai Ilona Kangizere.

Ilona ari papyldynoj, ka cyta projekta gaitā muzejs ir palics daīmamuoks cylvākim ar funkcionalim trauciejumim, tys ir, niu muzejā sataiseita taktiluo karte vuojredzeigim apmaklātuojim, kas paleidz lobuok orientētīs muzeja telpuos. Taipoš ir radeita mobiluo ekspoziceja “Neredzamā laime”, kurā vīnā lelā improvizātā čemodanā apkūpuoti golvonī celi iz laimi. Ekspoziceja apreikuota ar audio gidu vuojredzeigim apmaklātuojim. Paradzāts, ka “Neredzamā laime” varātu dūtīs izbraukumūs piec interesentu pīprasejuma.

Taipoš Ilona izsoka pateiceibu vysim muokslinīkim, kuri aizvadeitajā sezonā sasadorbuoja ar muzeju i nūdrūsynuoja sovus dorbus izstuodem i koncertim. Eipaša pateiceiba ari Larisai Kirilovai par Preiļu psihiatra, doktora Kuriloviča kolekcejis nūdūšonu muzejam, kas radejuse lelu apmaklātuoju interesi.

Projekta gaitā turysma vītom – Laimis sajiutu i dobys vāruojumu stygai i Laimis muzejam Indrā – tyka izgataveitys i pastateitys informativuos pluoksnis latgalīšu volūdā. Tekstus puorlyka Valentins Lukaševičs, nūdrūsynuodams precizitati i muokslinīcyskū izteiksmeigumu. Pluoksnis izgataveja i nūformēja muokslinīks i tieļnīks Romualds Gibovskis. Dizains organiski īsakļuove asūšajā parka i muzeja vidē.

Kai stuosta Ilona Kangizere, pārnejuo turysma sezona, 2025. gods, Laimis muzejam bejuse veiksmeiguoka, nakai īprīškejuo. “Pasasokūt plota mārūga nūtikšonom, kas nūtyka Kruoslovys nūvodā, kai ari poša muzeja organizātajom aktivitatem, apmaklātuoju skaits muzejā pīauga par 16 %, tai pārņ muzeju apmeklēja drupeit vaira nakai treis tyukstūšys gostu.”

Ilona ari doluos, ka lelī kūpeigi organizātī pasuokumi ir tī, kas atvad iz muzeju vysuvaira gostu. Pārņ tī beja “Retrotūrists 2025”, nūtikšona, kurū organizej senejūs motocyklu entuziastu apvīneiba “Retro Tūrists” i “Līgo rallijs”, kurū organizeja Dagdys Kulturys centrys. “Itī pasuokumi kolpuoja kai cīši veiksmeiga marketinga aktivitate, kas ļuove pīsaiseit papyldu apmaklātuojus, nu kurūs daudzi piečuok atsagrīze iz muzeju vēļreiz sovys saimis i draugu vydā,” stuosta Ilona.

Laimis muzejs Indrā sovys durovys apmaklātuojim attaiseja 2018. godā. Tys atsarūn tik desmit kilometru attuolumā nu rūbeža ar Boltkrīveju. Muzejs ir sataiseits Indrys luteraņu bazneicys ākā, kas bazneicys vajadzeibom nikod nav tykuse izmontuota. Āka izcalta 20. g. s. 30. godu beiguos, aiz tuo, ka storpkaru laikā Indrā beja daudz luteraņu. Pieckara godūs bazneicys āka tyka izmontuota kai sporta i izklaidis pasuokumu organiziešonys vīta.