Rokstu sagataveja: portals lakuga.lv

Aicynojūt īsadvasmuot nu Latgolys dobys, nu vysaidu augu i kulturys montuojuma, Maltys Bārnu i jaunīšu centrys izsludynuojs muokslinīka Jura Gaigala botaniskūs ilustraceju i rakstneicu Rozalejis Tabinis (Naaizmierstulis) i Annys Saksis augim veļteitūs literarūs dorbu rūsynuotu dubultkonkursu. Juo aizdavums ir veicynuot dobys izzynuošonu, rodūšū dūmuošonu i pīdareibys sajiutu Latgolys kulturtelpai, viestej konkursa idejis autoris i koordinatoris Skaidreitis Svikšys sagataveituo informaceja.

Kai stuosta konkursa reikuotuoji, dubultkonkursa vizualuos muokslys dalis idejis suokys ir muokslinīka Jura Gaigala, kuram itymā godā svieteitu 95. jubileju (dzims 1931. gods 5. aprelī Rēzeknis nūvodā), botaniskuos ilustracejis, kas ir precizs augu i augu pazeimu attāluojums. Bet konkursa literaruos dalis īdviesme ir latgalīšu rakstneicys Rozalejis Tabinis, kurei lobuok zynoma kai Naaizmierstule, puosokys par pučem gruomotā “Dīva duorza pučeites” (izdūta 1943. godā) i literatis Annys Saksis, par kurys pošys personeibu i rodūšuo dorba vītu Latvejis viesturē itūšaļt ir daudzi vaicuojumu, 1966. godā izdūtuo gruomota “Pasakas par ziediem” (itūgod saīs pyrmizdavuma 60. godadīna).

Dubultkonkursa mierkis ir styprynuot latvīšu literarū i latgalīšu rokstu volūdu, pīdareibys sajiutu Latgolai i kotram sovai dzymtajai vītai, taipat rūsynuot bārnu, jaunīšu i pīaugušūs interesi par literaturu, botaniskajom ilustracejom kai muokslys veidu i Latgolys duorzu i pļovu augim. Konkursā var pīsadaleit školāni nu 4. da 12. klasei i pīaugušī (školuotuoji i cyti individualī dalinīki bez vacuma īrūbežuojuma, kurī niu dzeivoj Latgolā voi sovulaik dzeivuojuši, gastejuši). Literaturai veļteitajā daļā vajag sagataveit puosoku voi atmiņu tāluojumu (var raksteit kai latvīšu literarajā, tai latgalīšu volūdā), bet botaniskuos ilustracejis vajag sagataveit iz A4 voi A3 izmāra papeira. Kai nūruoda reikuotuoji, konkursā pījims tik originaldorbus. Obeji konkursi tikšūt vārtāti atseviški vairuokuos grupuos, bet gola rezultats – Latgolys kongresa dīnys atzeimiešonai taiseita izstuode ar Jura Gaigala ilustracejom i konkursa dalinīku zeimiejumu i stuostu apkūpuojums. Puorsteiguma bolvys sajimšūt ari tī dalinīki, kurim vuordā voi pavuordē ir kaids pučis voi cyta auga nūsaukums.

Konkursa reikuotuoji dorbūs aicynoj eipašys viereibys dagrīzt taidom pučem i augim, kurūs sovulaik ilustriejs taišni muokslinīks Jurs Gaigals, par pīmāru, ašņa zuole, atraiteite, duobūls, uobeļneicys, vuolonta, cikoreja, cakule, gaileits, gandrine, buļbe, nasturka, nagatkeņa, lyni, mogona, auškareits, peipine, muolaineite, avīša, cārmyukša, apeiņs, vierba, rūža, naktineica, syla puryns, parečka, raudine, žybacteņa i cyti.

Latgolys duorzu i pļovu stuostim veļteitais konkurss nūteik nu 2026. gods 31. janvara da 31. marta. Vaira izzynuot par konkursu var juo nūlykumā ITE.