Rokstu sagataveja: portals lakuga.lv

Daudzi byus pamanejuši, ka socialajūs medejūs Facebook i TikTok jau kaidu laiku aktivi var sekuot leidza lauku dorbim i giut idejis iedīņu pagataveišonai nu pozitivuos i patīsuos Kristīnis Gjačys. Tok janvara izskaņā Kristīne tyka pi jauna titula – dzeraunis influencere. Itai jū īsauce dokumentaluo raidejuma “Province” veiduotuoji, kuri vīnā nu raidejumu sekuoja leidza Kristīnei juos lauku dorbūs. Kristīne īt nu Preiļu nūvoda Stabuļnīku pogosta Viļceņu. Zamuok vari nūsavērt raidejumu ar jū i giut treis idejis, kū sadareit itamā nedeļā!

Aizdegt sveci mīram

Februars teik saukts par sveču mienesi. Mes jiutam i redzim, ka goda tymsuokuo puse sūļoj paceli, dīnys palīk garuokys, i kluseņom tyvojās pavasars. Svecis ir taids gaišuma, mīra i svātuma olūts, partū aicynoju bīžuok aizdegt sveci par mīru sātā, mīru sirdī i mīru pasaulī.

Nasaskūpuot ar vuordim “Es tevi mīļoju!”

14. februars ir Svātuo Valentina dīna ci vysu meiļuotuoju dīna. Kas gon mes byutu bez mīlesteibys? Mīlesteiba var daudzi – dzīdynuot, apbūrt, pībūrt, dūt spuornus i nūgalynuot. Kab pasaceitu “Es tevi mīļoju!”, navajag gaideit 14. februara, tys juosoka kotru dīnu! Partū aicynoju vysus kasdīnā sovim meilajim saceit itūs svareigūs vuordus. Sokit, cik jī jums ir duorgi i cik cīši jūs mīlojit. Pasauļs pagaideis, bet laiks – nā.

Atrast šaļti atpyutai i syltam dzierīņam

Itei ir taida syltūs dzierīņu sezona. Kas var byut lobuoks par syltu, aromatisku čaju itymā soltajā laikā? Mes skrīnam, skrīnam, sytomēs pa tim dorbim, ka aizmierstam par sevi i sovu veseleibu. Aicynoju vysus (ari es poša raudzeišu) piec dorbu voi školys pīsēst mīrā, īsateit dečī, apmaukt syltys zečis, ītaiseit gordu, veseleigu, aromatisku i nūmīrynūšu čaju. Lai čajs palīk par īrodumu, kas uzdzan mīru i syltumu nu pierstu da pakauša. Sorgojit seve, sovus meilūs, i Dīveņš sorguos jius!