Rokstu sagataveja: portals lakuga.lv

Ar teksta video ”Marejis teirums” muziks Sovvaļnīks dasoka jaunu dzīsmi i izsludynoj koncertu “Sovvaļnīkam – 18”, kas nūtiks 2026. gods 25. septembrī Latgolys viestnīceibā “Gors”. Dzīsmis teksta autore ir dzejneica Anna Rancāne, kas itū dzejūli veļtejuse Ukrainys piļsātai Mariupolei, kas ir smogai cītuse vaidu laikā. Dzīsme ir īkļauta Sovvaļnīka catūrtajā muzykys albumā “Cārtumi”, kas saulis gaismu īraudzeis 1. julī.

Sasadorbojūt ar dzejneicu Annu Rancāni jau vaira nakai desmit godu i zynūt juos dzejis styprū izteiksmi, dziļumu, metaforiskumu, Sovvaļnīks ir radejs kuortejū puordūmu pylnū dzīsmi, kas līk apsazynuot pasauļa kuorteibys trauslumu i reizem naizbāgamys cīsšonys ceļā iz gaismu. Dzīsmē atkluotū nūskaņu spieceigai papyldynoj teksta video, kū veiduojs Dāvis Kots, kurs soka: “Dzīsmis “Marejis teirums” videoklips veiduots kai simboliskys skatejums nu nuokūtnis – kai dokumentals redzīņs iz nūtykumim, kas atstuoj dziļu nūspīdumu pošys piļsātys i ari cylvāku liktiņūs.”

Sovvaļnīks ir pabeidzs dorbu pi sova catūrtuo albuma “Cārtumi” ar latgalīšu dzejnīku (A. Rancānis, O. Seiksta, Marijis Dzeislys i cytu) dzejis ryndom. Albums ir gondreiž akustiskys, pīduovojūt cytaižuoku Sovvaļnīka redzīni iz latgalīšu dzeju, i tys izīs 1. julī.

“Ir gryuši byut rodūšam i mīreigam, kod apsazynoj pasauļa nastabilitati. Vaidi, kas valkās jau pīktū godu, roda namīra i nadrūšeibys sajiutu, bet mes vys vēļ atbolstam i ticim Ukrainys uzvarai,” soka Sovvaļnīks.

Sovvaļnīks (eistajā vuordā Ingars Gusāns) ir latgalīšu muziks, kurs da ituo ir izdevs treis albumus – “Sūpluok” (2009), “Bolts susātivs” (2010) i “Napaseitynuots” (2016), kurūs asūšuos dzīsmis ir saraksteitys ar pazeistamūs latgalīšu dzejnīku (Ontona Kūkuoja, Annys Rancānis, Oskara Seiksta, Valentina Lukaševiča i cytu autoru) vuordim.

Jaunuos dzīsmis īrokstā pīsadalejuši Mareks Gusāns, Mārcis Lipskis i Gints Stankevičs. Dzīsmis īroksts taiseits Reigā, “Factory Sounds Studio” pi muzykys producenta Ginta Stankeviča. 

Albums “Cārtumi” izdūšonai teik gataveits ar Vaļsts kulturkapitala fonda mierkprogramys “Latvīšu viesturyskūs zemu atteisteibys programa” i bīdreibys “Latgolys regiona atteisteibys agentura” atbolstu. Projektu eistynoj bīdreiba “Latgolys Producentu Grupa”.