Projekts ir sovpateigs ar jaunim rysynuojumim dzejis laukā. Ideja dzymuse ailinīku Joko Danno (Japaneja) i Džeimsa Hopkinsa (ASV) gasteišonys reizē Dzejis dīnuos Latvejā 2010. godā, obejim alinīkim īpasazeistynojūt Latvejis publiku ar sadarbeibys dzeju – kūpeiga dzejpanta taiseišona – ailinīki reizē taisa kotrs sovu i kūpeigu dzejūli. Autori sadarbeibys dzeju rakstejuši kotrs sovā dzeivuošonys vīta i sasazynojūt caur škārsteiklu. Dzejis skaitejumu Reigā papyldynuoja ambientuo muzyka i kartenis. Sadarbeibys dzejis taiseišona ir saisteita ar Japanejis literarū tradiceju.

2011. godā roduos ideja sataiseit Latvejis dzejnīku sadarbeibu dzejūļu cyklu, rūsynojūt Latvejis dzejnīkus taiseit kūpeigus divdzejūļus kai vīnuotus volūdiskus atspeidumus dažaidu kruosu asociacejom. Ituo goda vosorā projekta īsasaisteja 18 Latvejis ailinīki – Juoņs Rūkpeļņs, Maira Asare, Inga Gaile, Anna Auzeņa, Kārlis Vierdeņš, Valts Ernštreits, Edvīns Raups, Inga Uobele, Ruta Štelmahere, Andra Manfelde, Sergejs Timofejevs, Semjons Hanins, Andris Akmenteņš, Eduards Aivars, Artis Ostups, Ivars Šteinbergs i nu latgalīšu vyda Valentins Lukaševičs i Karonhisaka (Evika Muiznīce), kai ari Joko Danno i Džeimss Hopkinss.
Seši dzejūli topuši latvyski, puorejī četri – latgaliski, lībiski, krīviski i angliski, tai paruodūt volūdu skonu i semantiskū daudzveideibu. Projekta nūsaukumā pīsauktuo dzejislūde ir simbols, kas paruoda kotra divdzejūļa byuteibu – sasavīnuot no divejom dzejis puslūdem vīnā vasalā – dzejislūdē īdzeivynojūt na viņ volūdys, nu ari emocionalū vīnuoteibu.

Vairuoki Latvejis video muokslenīki i muziki tyka uzrunuoti taiseit kotram dzejūļam video i audio fonu, i itymā vokorā Pītera bazneicā byus vareiba pīdzeivuot itū sadarbeibys energeju.

Īeja bez moksys.