Latgolys Kulturas centra izdevnīceiba aicynoj īsnīgt rokstus i literarus dorbus 2013. goda kulturviesturiskajai i literarajai godagruomotai „Tāvu zemes kalendars” i 18. literaturys almanaham „Olūts”.

1990. goda aprelī tyka dybynuota sabīdryska organizaceja „Latgolys Kulturys centrs”, vīns nu juos darbeibys aizdavumu beja gruomotu izdūšona, tuo poša goda junī tyka nūdybynuota LKC izdevnīceiba. Izdevnīceibys dybynuotuojs i vadeituojs ir Juoņs Eļksnis, godagruomotys „Tāvu zemes kalendars” i literaturys almanaha „Olūts” sastateituoja ir Valentine Unda. LKC izdevnīceibys mierki ir latgalīšu rokstu volūdys atteisteišona, latgaliski voi par Latgolu rokstūšūs autoru atbolsts.

Godagruomotai „Tāvu zemis kalendars” ir cīši gars myužs — juos pyrmais godaguojums izlaists Daugovpilī 1939. godā, nu 1945. leidz 1990. godam kalendars izguojs Rītumvuocejā, nu 1991. goda — otkon Latvejā, Rēzeknē.
Tāvu zemis kalendars nav izguojs viņ Baigajā godā, deļtuo juo izdūšona i ir vīna nu golvonūs izdevnīceibys prioritašu.
Obeji kruojumi izīt kasgods i teik drukuoti latgalīšu rokstu volūdā. Tāvu zemis kalendars aptver plašu tematiku: lauksaimnīceiba, medicina, arheologeja, viesture, kulturviesture, publicistika, memuari, dzeja i proza. „Olūtā” teik publicātys lugys, dzeja, eisī i garī stuosti, kai ari literaturys kritika.

Roksti nadreikst byut da tuo publicāti. Jūs var īsnīgt personeigi, pa postu voi e-postu.
Adrese: LKC izdevnīceiba, Bazneicys īla 28, Rēzekne, LV-4601.
E-posta adrese — lkcizdevnieciba@apollo.lv
Sātyslopa — http://www.lkcizdevnieciba.lv/

Kartenis no “Olūta” i Tāvu zemis kalendara attaiseišonys svātku ituo goda julī.