Andra Kalinina izstuode “Klusā daba nav daba, bet ir”

Kod:
28/10/2022 vysu dīnu
2022-10-28T00:00:00+03:00
2022-10-29T00:00:00+03:00
Kur:
Bolvu nūvoda muzejs

Nu 10. septembra da 28. oktobra Bolvu Nūvoda muzejā byus apsaverama muokslinīka Andra Kalinina izstuode “Klusā daba nav daba, bet ir”. Izstuodi veiduos gleznys, kas īdvasmuotys nu klusuos dobys žanra klasikys, tok runoj par tū ar konceptualu pīeju.

Vuordam “doba” skaidrojūšajā vuordineicā ir div nūzeimis – vysupyrma, tys apzeimej vysa apleik eksistejūšuo uorejū veidūlu ainaviskā izpratnē, pa ūtram, par “dobu” teik sauktys ari kaidys paruodeibys golvonuos eipašeibys, kas varātu izsaceit tūs byuteibu. Reflektejūt par itū nūzeimu mejīdarbeibu, Andris Kalinins izstuodē radzamajūs dorbūs meklej veidus, kai attāluot klasiskajā muokslys žanrā pījimtūs sižetus, naattālojūt tūs uorejū formu. Tuo vītā attāluojums teik aizstuots ar trīpīņa rakstura, dorba izmāra i konteksta saspēli.

Izstuodis nūsaukums nūruoda iz sova veida paradoksu, raugūt definēt hrestomatiskū muokslys žanru, taipat kai izstuodis dorbi paruoda sadzeivis paradoksus. Veidojūt dorbus, Kalinins citej vairuokus labi zynomus muokslinīkus – Bruno Vasilevski, Renē Magritu i Džozefu Košutu, kurūs daiļradē objektivais pasauļs attāluots, dorbim saturūt vaira nakai tū spiej fotografiskuos realitatis attāluojums.

Ideja veiduot izstuodi Bolvu Nūvoda muzejā roduos sarunā ar muzeja direktori i grybūt atsagrīzt pi sovu sakņu – kai muokslinīks Andris Kalinins, tai izstuodis kuratore Kristīne Ercika obeji dzymuši Bolvūs. Taipat obejim ruodīs svareiga laikmeteiguos muokslys daīmameiba i decentralizaceja, kai ari vareiba struoduot uorpus lelūs muokslys centru rūbežu, tymā pošā laikā īpazeistynojūt regiona dzeivuotuojus ar laikmeteiguos muokslys nūtikšonom.

Izstuodi papyldynuos ari izgleiteibys programa, kas ītvers ekskursejis školānim, dorba lopys izstuodis apmekliejumam bārnim i pusaudžim, kai ari eipašu sasatikšonu ar seniorim i sarunys izstuodē ar muokslinīku. Izstuode kūpā ar izgleitojūšu programu cytugod byus apsaverama ari Preiļūs, Ludzā i Rēzeknē.

Andris Kalinins (1994) studiejs Latvejis Kulturys koledžā i Latvejis Muokslys akademejis scenografejis nūdaļā (prof. A. Freibergs, M. Pormale, V. Jansons), sovys zynuošonys papyldynuojs Vīnis Muokslys akademejā pi prof. Annys Fībrokys (Anna Viebrock). Kai scenografs i kostimu muokslinīks veiduojs izruodis Valmīrys teatrī, Latvejis Nacionalajā teatrī i Dailis teatrī, kai ari naatkareigūs teatru projektūs. Kai patstuoveigs muokslinīks pīsadalejs vairuokuos grupu izstuodēs (tymā skaitā izstuožu zalē “Arsenāls”, Kolncīma kvartala galerejā, Cāsu ols bryuzī, Reigys R. Vāgnera nomā). Itūvosor atkluota pyrmuo muokslinīka personalizstuode “Andra Kaļiņina eļļas glezniecība” Jiurmolys muzejā.

Print Friendly, PDF & Email

Nūtikšonu kalendars

Dec
8
Cat
20:30 Latgolys prozys skaitejumi 2022 @ dzeļžaceļa staceja "Rēzekne II"
Latgolys prozys skaitejumi 2022 @ dzeļžaceļa staceja "Rēzekne II"
Dec 8 @ 20:30 – 21:30
Itei nedeļa ir storptautyskuo literaturys festivala “Prozas lasījumi” nūtikšonys laiks, kurā catūrtdiņ, 8. decembrī, pusdeveņūs vokorā kluotīnē i tīšraidē varēs pīdzeivuot konkursa “Latgolys prozys skaitejumi 2022” nūslāguma pasuokumu. Konkursa nūslāgums byus kai nūstuošona i pasaglobšona[...]
Dec
9
Pīk
19:00 Latgaļu muzykys i garšys vokors @ Zeit
Latgaļu muzykys i garšys vokors @ Zeit
Dec 9 @ 19:00 – 21:00
9. decembrī 19.00 rodūšuo kvartala “Zeit” Lelajā zalē nūtiks latgaļu muzykys i garšys vokors kūpā ar muziki Ēriku Zepu. Beleti: bilesuparadize.lv, zeit.lv/veikals i Zeit Cafe kasē.