“Topi stipra, sirds” – koncertizvadums, kas veļteits izcyluos latvīšu dzejneicys i dzīsmineicys Bronislavys Martuževys 100. jubilejai. Koncertizvaduma muokslinīcyskū koncepceju veidoj dirigente Aira Birziņa i aktrise Baiba Broka. Dzejneicys Bronislavys Martuževys (1924–2012) symtgade tiks svieteita 2024. gods 8. aprelī. B. Martuževa ir vasala laikmata legenda, kurys dzeja navar atdaleit nu juos personeibys – tū caurvyn ticeibys spāks, kristeiga cylvāka teirais dzeivis redziejums i patīsa tāvzemis mīlesteiba.

 

Koncertizvadumā pīsadaleis aktrise Baiba Broka, soliste Ieva Parša, VEF Kulturys piļs sīvīšu kors “Dzintars” i dirigente Aira Birziņa, instrumentaluo grupa – Mārtiņš Zilberts (klavīris), Indulis Cintiņš (vejūle), Ainārs Paukšēns (čells), Laima Jansone (kūkle) i Valdis Zilveris (akordeons). Skanēs eipaši itam izvadumam radeiti jaundorbi – komponistu Jēkaba Jančevska, Valda Zilvera i Artura Maskata muzyka ar Bronislavys Martuževys dzeju. Programā byus īkļautys ari pošys dzejneicys sacarātuos dzīsmis eipašūs aranžiejumūs koram i instrumentalajai grupai. Koncertizvadumu caurveis B. Martuževys dzeja aktrisis Baibys Brokys skaitejumā. Muzykalajā stuostā sasaveis dzejneicys literarajā montuojumā īkodātuos i myužā izdzeivuotuos vierteibys – pateiceiba i pazemeiba Dīva prīškā, dzymtuos zemis, dobys i cylvāku mīlesteiba, personeibys gora spāks i dzeivi aplīcynūša energeja. Mīlesteibys dzejā atsakluos vēļ vīna cīši ciļvieciska B. Martuževys personeibys škautne – dzili i kaisleigi jiutūša sīvīte. “Dyžans mozums vad iz dyžanu lelumu” – tī ir Bronislavys Martuževys vuordi, kas izalaseiti par dzejneicys symtgadis simboliskū saukli i truopeigai raksturoj juos personeibu i pasauļa redzīni.

 

Dzejneica Bronislava Martuževa – īškejuos breiveibys i gora spāka simbols, nacionaluos pretuošonuos kusteibys daleibneica, represāta, izsyuteita iz Sibireju, apbolvuota ar Treju Zvaigžņu ordini. Dzejneicys rodūšuo biografeja, dzeivis stuosts i personeibys kontrastainuo daudzveideiba nas sevī jaudeigus impulsus Latvejis 20. godu symta viesturis izpratnei i īdviesmi vierzeibai iz prīšku.

 

“Bronislavys Martuževys dzeja, juos skaudruo, seikstuo, dzeiveibys spāka pylnuo, narimteigai rodūšuo personeiba manī raisa na viņ miļzeigu cīnu kai pret muokslineicu i stypru cylvāku, tok ari izaicynoj napasadūt ituo laika gryuteibu, kompromisu prīškā, meklēt i sajust tū spāku, kū dūd ticeiba Dīvam, i izturēt vysu, kū dzeive – kotram tik atškireigu – mums ir paredziejuse. Martuževys dzejā es rūnu spāka vuordus ari sovai dzeivei. Lai tī īdvasmoj myus vysus!” par koncertizvadumu soka aktrise Baiba Broka.

 

Koncertizvaduma “Topi stipra, sirds” pyrmizruode nūtiks 2024. gods 13. aprelī Latgolys viestnīceibā “Gors”. Izvadums skanēs ari 19. majā VEF Kulturys piļs Kamerzālē, Reigā, i 26. majā Lubuonys evaņgeliski luteriskajā bazneicā.