Leldīnis koncertā skanēs teicieju bolsu, jūs stuosteituos dzeivis gudreibys. Tymā tiks izdzīduotys tuos Latgolys nūvoda dzīsmis i dejis, kas, atsajaunojūt “Grodu” dalinīku sastuovam, repertuarā īguojušys pādejūs godūs. Eipaši īcīneita itūšaļt “Grodim” ir Latgolys daudzbalseiguo a capella dzīduošona, tok koncertā naizpaliks ari jaunuokuo folklorys sluoņa dzīsmis ar muzykys instrumentu pavadejumu.

 

Folklorys kūpa “Grodi” dybynuota 1987. godā. Tuos darbeibys pamatā ir tautys tradiceju izzynuošona, vuiceišonuos i tuoluoka populariziešona. Kūpys dalinīki vuoc folklorys materialus ekspedicejuos pi tautys teicieju, kur ari vuicuos tradicionalū dzīduošonys i muziciešonys manīri. Sasadorboj ar etnomuzikologejis, arheologejis, antropologejis, astronomejis i cytu zynuotņu specialistim senejūs tradiceju izzynuošonā i atjaunuošonā. “Grodu” dalinīki ir sataisejuši 12. godu symta latgaļu apgierba i rūtu precizys rekonstrukcejis. Kūpa reikoj i pīsadola tautys tradicionalūs svātku svieteišonā i ar tim saisteitajūs ritualūs.