Pīktdiņ, 22. martā, 16.00 stuņdēs Rotko muzejā nūtiks 12. Storptautyskuo Latgolys grafikys simpozeja nūslāguma izstuodis atkluošona i muokslinīku gūdynuošona.

Storptautyskais Latgolys grafikys simpozejs, kas itūgod nūteik nu 8. da 22. marta, jau divpadsmytū reizi Daugovpilī puļcej grafikys muokslinīkus nu vysa pasauļa.

Īpazeistūt Daugovpiļs cītūksni i urbanū vidi i apmeklejūt Latgolys kulturvītys, muokslinīki nu Pūlejis, Fraņcejis, Horvatejis, Itālejis, Igaunejis, Latvejis i Taivānys vēļ turpynoj radeit muokslys dorbus, īzeimejūt sovu individualū rūkrokstu i paruodūt grafikys medeja plašū tehniskū daudzveideibu.

Piec diveju nedeļu intensiva dorba Rotko muzeja studejuos simpozeja izskaņā muzeja izstuožu zālē tiks atkluota kūpeiga izstuode i gūdynuoti muokslinīki Magda Šplita (Magda Szplit, Pūleja), Henriks Krolikovskis (Henryk Krolikowski, Pūleja), Peili Huana (Peili Huang, Taivāna), Vitālija Samuilova (Vitalia Samuilova, Fraņceja), Lorenco Natāli (Lorenzo Natali, Itāleja), Edvins Dragičevičs (Edvin Dragičević, Horvateja), Kadri Toma (Kadri Toom, Igauneja), Paskāls Piņons Žafs (Pascal Pignon Jaf, Fraņceja), Anna Klosa (Anna Kłos, Pūleja) i Oksana Vronska (Latveja).