Izstuodē “Biotops” muokslineica izsoka apbreinu par dobys procesim. Jo cīšuok i viereiguok īsaver, jo vaira spiej saredzēt. Pīmāram, laiks. Laiks dobys procesūs ir cīši seceigs i strukturāts. Kotrai nūtikšonai ir preciza šaļts, tū palaižūt garum, nūbruktu vysa kuorteiba. Leidzsvors dobā ir apbreinojamai “nūsleipāts”, dabyskūs procesūs vysi elementi ir savīnuoti i lūmys sadaleitys. Cylvāks var plyust laikā, pīpiļdeit tū ar sovu dabyskū byuteibu, piļdeit sovu miseju, byut daļa nu vasaluma, bet var pretuotīs i ceineitīs. Cylvāks var sasadorbuot, dzeivuot simbiozē ar cytim ituos planetys organismim, bet var atsasaceit nu sadarbeibys i raudzeit dzeivuot pats atseviški, taiseit sovus lykumus. Formys dabyskajūs procesūs pylda funkceju. Naatkuortojamā meistareibā taiseits kotrys pumpurs, zīds, lopa, kab tī piļdeitu sovu miseju vyslobuok. Kai pumpurs sasakļuovs auklej trauslū zīdu vysu zīmu, kai sāklys lidoj ar sovim vysaiduokajim spuornim, kai auglis kārdynoj, kab tuo sāklys tyktu aiznastys plašajā pasaulī – tī ir dobys inženerejis meistardorbi, grandioza arhitektura i vīnreizejis inovacejis.

Maguone Boleiko (dz. 1985.g.) 2004. godā absolvējuse Rēzeknis Muokslys vydsškolys Mūdis dizaina nūdaļu. Nu 2005. gods studējuse Latvejis Muokslys akademejā scenografeju, konceptualū gleznīceibu, 2013. godā dabojūt magistra gradu muokslā. 2023. godā dabuojuse RTA sertifikatu pedagogiskuo procesa vadeibā i organizacejā. Sareikuojuse 14 personalizstuodis. Dorbi īkļauti Latvejis Nacionaluo muokslys muzeja kolekcejā. 2023. godā sataisejuse interešu izgleiteibys programu “Dabas mākslas skola”.

Latgolys viestnīceibys “Gors” Muokslys galereju var apmeklēt nu ūtardīnis leidz svātdīnei, nu 12.00 leidz 22.00.