Oktobrī Rēzeknē nūtiks Juoņa Streiča jubileja lelkoncerts

LaKuGa 26. Majs, 2016. gods Comments Off on Oktobrī Rēzeknē nūtiks Juoņa Streiča jubileja lelkoncerts

streics1. oktobrī Rēzeknē, Latgolys viestnīceibā GORS, nūtiks kruošņs jubileja sareikuojums, kurymā pīsadaleis režisora dzeivē i daiļradē nūzeimeigi ļauds. Kab sveiktu Meistaru dzimšonys dīnā i duovuotu juo “jaunu dīnu zemei” Latgolai eistus svātkus, koncertzalā gasteis Maestro Raimonds Pauls, Kauņys muzykaluo teatra primadonna, jubilara meita Viktorija Streiča ar sovim kolegim nu Lītovys, kai ari režisora daiļradē i kinuos nūzeimeigys lūmys spielejūšī akteri Artūrs Skrastiņš, Rēzija Kalniņa, Ivars Kalniņš, Gundars Āboliņš, Juoņs Paukštello, Uldis Dumpis i cyti.

Jubileja svineibu režeju veiduos Juoņa Streiča meita Viktorija i znūts Kestutis Jakštas. Viktorija itūšaļt ir Kauņys muzykaluo teatra režisore i vodūšuo aktrise, sovukuort juos dzeivisbīdrys Kestutis Jakštas – ituo teatra golvonais režisors.

Rēzekne ir Juoņa jauneibys piļsāta ar pyrmajim juo sūlim pedagogejā, gleznīceibā, teatra muokslā i režejis praksē Tautys teatrī, kai ari ar dorbu pi pyrmuos i vīneiguos Latgolys kinys “Cylvāka bārns”. Zeimeigai, ka itei kina, taipat kai režisors, itūgod ir jubilare. Taišni Rēzeknē pyrma 25 godu Zīmyssvātkūs nūtyka kinys “Cylvāka bārns” pyrmizruode.

Juoņs Streičs ir personeiba, bez kuruos gryuši īdūmuojama Latvejis goreiguo ideņtitate šudiņ. I na tik partū, ka lela daļa juo radeitūs kinu palykušys par latvīšu kulturys zalta fondu, nu ari partū, ka juo dziļuo Latvejis sajiuta, patīsuo i vīnkuoršuo cylvākmīlesteiba, plotais pasauļa redzīņs i skaidruo volūda ir napuorviertejama vierteiba myusu tautys ceļūs i liktiņgrīžūs.

Publicitatis karteņa

Komentari slāgti.