Bolvūs apsaverama Zīmeļlatgolys dobys fotoizstuode

LaKuGa 23. Marts, 2017. gods Comments Off on Bolvūs apsaverama Zīmeļlatgolys dobys fotoizstuode
Bolvūs apsaverama Zīmeļlatgolys dobys fotoizstuode

Da 13. apreļa Bolvu Nūvoda muzejā apsaverama fotoizstuode “Latvijas dabas spēks un skaistums”, kurymā radzama Zīmeļlatgolys doba i tuos vierteibys, informej Bolvu nūvoda Turisma centra puorstuovi.

Paguojušuo goda beiguos Bolvu nūvoda pošvaļdeiba projekta “Loba doba Zīmeļlatgolā jeb atklāj dabas pētnieku sevī!” ītvorūs reikuoja fotoakceju, ar mierki paruodeit Zīmeļlatgolys – Bolvu, Viļakys, Ruguoju, Baļtinovys i Kuorsovys nūvodu dobu i tuos vierteibys, ītverūt četrys dobys stihejis – Guņs, Zeme, Gaiss i Iudiņs. Fotoakcejā tyka aicynuoti pīsadaleit i foto amateri, i profesionali. Atsauceiba nu vītejūs dzeivuotuoju i regiona gostu beja lela i kūpā 94 kartenis īsnīdze 21 autors.

Fotoizstuodei “Latvijas dabas spēks un skaistums” tyka atlaseitys 30 kartenis. Izstuodē apsaverami Aivijis Gritānis, Aigara Mača, Antrys Lipskys, Astrīdys Puško, Daigys Morozys, Daiņa Poikāna, Elīnys Kergis, Elitys Mozulis, Ilutys Keišys, Juoņa Rakstiņa, Juoņa Slišāna, Santys Paeglis, Ritys Keišys, Vilhelma Laganovska i Zinaidys Loginys dorbi, kurymūs attāluota Zīmeļlatgola vysūs četrūs godalaikūs, paruodūt i pavasara polu spāku i vosorys zvaigžņuotūs nakšu burveibu, i rudiņa kūšuos kruosys, i zīmys boltumu. 

Izstuodis apmaklātuojim byus daīmams ari projekta ītvorūs radeitais “Ziemeļlatgales dabas tūrisma ceļvedis”, kurū rūtoj ari vairuokys akcejā īsyuteituos kartenis.

Izstuode da 2017. goda rudiņa byus apsaverama ari Kuorsovys nūvodā (18. apreļs – 19. majs), Ruguoju nūvodā (22. majs – 19. juņs), Viļakys i Baļtinovys nūvodā.

Projekts “Loba doba Zīmeļlatgolā jeb atklāj dabas pētnieku sevī!” veļteits Latvejis symtgadei i teik eistynuots ar Latvejis vidis aizsardzeibys fonda i Vidis aizsardzeibys i regionaluos atteisteibys ministrejis finansialu atbolstu.

Komentari slāgti.