“Pi myusim Latgolā” par Latgolys kongresam veļteitū pīminekli

LaKuGa 16. Juļs, 2017. gods Comments Off on “Pi myusim Latgolā” par Latgolys kongresam veļteitū pīminekli
“Pi myusim Latgolā” par Latgolys kongresam veļteitū pīminekli

Itūgod raidejums “Pi myusim Latgolā” jau ir viestejs par tū, ka daudzys latgalīšu sabīdryskuos organizacejis diskutēja i ceinejuos par Latgolys kongresa symtgadis atcerei veļteituo pīminekļa uzrokstim i tū, kai Rēzeknis piļsātys dūme pīsakuope latgalīšu sabīdryskūs organizaceju spīdīņam. Itūreiz Tenis Bikovskis raidejumā “Pi myusim Latgolā” aktualizej vaicuojumu par pīminekļa apleicīnis sakūpšonu i lobīkuortuošonu.

Ituo gods 5. majā, asūt kluotyn vaļsts augstuokajom amatpersonom, medejim i citym gostim, Rēzeknē tyka atkluots pīmineklis “Latgolys kongresam 100. Jau tūreiz beja skaidrys, ka pats pīmineklis ir gotovs i pastateits, nu vaicuojums par tuo apleicīni daudzūs radeja naizpratni.

Pīminekļam atvālātuo teritoreja tyka īkuortuota lelā steigā, apzaļumuota daleji, viņ dažys dīnys pyrma pīminekļa atkluošonys. Sūleitūs boltuo i palākuo betona pluokšņu, granita pakuopīņu i simboliskūs storu vītā apleicamais laukums tyka nūbārts ar smolkom akmiņa skombom. Saimem ar bārnu rotim, cylvākim rateņkrāslūs i damom augstpapiežu kurpēs itūšaļt tikšona da pīminekļa ir apgryutynuota.

Pīminekļa pastateišonys i lobīkuortuošonys dorbus beja planavuots pabeigt jau aprelī. Piec pīminekļa atkluošonys paguojuši div mieneši, tok apleicīne vēļ nav sakuortuota. 

Karteņa: Renāte Lazdiņa

Komentari slāgti.