Poetiskuo roka apvīneiba “Kapļi” pīduovoj dzīsmi “Valereja Seile”

LaKuGa 1. Novembris, 2017. gods Comments Off on Poetiskuo roka apvīneiba “Kapļi” pīduovoj dzīsmi “Valereja Seile”

Gaidūt vaļsts svātkus, poetiskuo roka apvīneiba “Kapļi” klauseituojim pīduovoj dzīsmi “Valereja Seile”.

Ideja par dzīsmi roduos vēļ paguojušuo goda beiguos, grupys liderim Oskaram Orlovam (Raibīs) i Arņam Slobožaninam sasateikūt “Kapļu” bāzē i mieginuojumu telpā Bozuovā, kur dzyma dūma alternativā manīrē īpazeistynuot  klauseituojus ar vēļ vīnu izcylu latgalīšu sabīdriskū darbineicu Valereju Seili. Reizē dzīsmē teik pīmynāts i kuortejū reizi “izvasts nu skapa” ari  “vadūņs” Kārlis i nazkodejais Latvejis uorlītu ministrs Vilhelms Munters. Dzīsme suokumā planavuota vīglā tvista manīrē, nu, struodojūt pi aranžiejuma, tykuse pi jaudeiga pankroka skaniejuma.

Zynomais underground multimuokslinīks GuntiX (Gunārs Indričāns) dzīsmi komentej itai: “Ite kai ar aizdagtu spičku vērtīs mopeda bakā, cik daudzi palics…” Sovukuort muzikis i politiks Guntis Rasims ironizej: “Kai jums nav kauna! Taidus tekstus raksteit!? Kur verās pasauļs!? Naaizskaramus tautys supervarūņus apvainuot!? Kas jius narkomani koč kaidi?!” 

Poetiskuo roka apvīneiba “Kapļi” vielej vysim gūdam sagaideit i nūsvieteit vaļsts 99. dzimšonys dīnu. “Lai dzeivoj breiva Latveja! Lai dzeivoj demokrateja!”

Īrokstā pīsadaleja: Arņs Slobožanins (gitara), Elgars Ludboržs (gitara), Rasma Kulamova (tausteni), Oskars Orlovs (bolss), Zurabi Ivanāns (bass) Andris Jurāns (bungys). Īroksts veikts skaņu īrokstu studejā “Bozova”. Miksēja Armands Treilihs. Videoversejis autors – Artūrs Slišāns.

Komentari slāgti.