Latgaliski izdūts Antuana de Sent-Ekziperī “Mozais priņcs”

LaKuGa 15. Majs, 2018. gods Comments Off on Latgaliski izdūts Antuana de Sent-Ekziperī “Mozais priņcs”

Roksta autore: Ilga Šuplinska, kruojuma literaruo redaktore

26. aprelī ceļu pi skaiteituoja aizsuoka Antuana de Sent-Ekziperī gruomota “Mozais priņcs”, tulkuojuse Evika Muizniece, literaruos redaktoris Maruta Latkovska, Ilga Šuplinska. Gruomotys autortīseibu turātuojs i izdeviejs vuocu izdevnīceiba “Tintenfass”, kas nūdrūšynoj ari tū, ka gruomota teik izplateita i tū var īsaguoduot vysā Eiropā.

2015. godā izreiz piec Luisa Kerola gruomotys “Alise Breinumu zemē” prezentacejis pasaruodeja pīduovuojums sadarbeibai nu vuocu izdevnīceibys “Tintenfass”. Pīduovuojums tyka pījemts i, leidzeigi kai Alisis tulkuošonys procesā, uorzemu izdevnīceibai, pyrmam kuortom, ir/ beja interese par literaturys klasikys izdūšonu kaidā nu mozojom volūdom, ūtram kuortom, jei nūdrūšynuoja autortīseibu vaicuojumu sakuortuošonu. Var saceit, ka sadarbeibā ar vuocu izdevnīceibu, pasateicūt juos vadeituojam Valteram Zaueram (Walter Sauer), asom pasavierzejuši sūli iz prīšku: itamā reizē vuocu izdeviejs pīkryta, ka teik saglobuotys originalilustracejis, gruomotys metiņa leluokuo daļa teik puorvasta iz Latveji. Alisis gadejumā tyka izdūtys divys atškireigys gruomotys: vīna Latvejā ar kaitu papyldynuojumim, ūtra Īrejā ar originalzeimejumim. Tūreiz natyka panuokta vīnuošonuos, ka ideņts izdavums ir ari Latvejā. Varātu rastīs vaicuojums, parkū tai? Tys ir saisteits ar atškireigajom izmoksom i cenom, kū pīduovoj uorzemu izdevnīceibys Eiropā i par kaidu cenu var atsaļaut īsaguoduot gruomotu tepat Latvejā. Tok gruomota ir, i Latgolys kongresa dīnā tei jau ir aizceļuojuse pi daudzim skaiteituojim vysmoz 15 školuos. Gruomotys izdūšonu finansej Rēzeknis Tehnologeju akademeja, projekts “Nūvodvuiceiba” (Izgleiteibys i zynuotnis ministrejis fiansiejums).

Kai gruomotys prezentacejā atzyna gruomotys tulkuotuoja E. Muizniece, tei ir vīna nu tom gruomotom, kū jei puorskaita ik pa laikam. Leidzieguos dūmuos beja ari gruomotys literaruos redaktoris: M. Latkovska i I. Šuplinska. Ari muzykalī gosti – Guntis Rasims i Arnis Slobožanins atzyna, ka gruomota fascinej ar sovu patīsumu i bierniškeigū atvierteibu pasauļam. Vysi atzyna, ka gruomota „Mozais priņcs” ir vīna nu tom, kū skaita dažaidūs vacumpūsmūs i pamona piļneigi atškireigys i dzeivus jāgu styprynūšys vierteibys.

Ari Tev juoatrūn sovys saistūšuokuos puslopys itamā gruomotā, bet, īdrūšynojūt Tevi skaiteit latgaliski, atguodynojam vīnu nu spūdrūkūs ituos gruomotys dūmu gryudim: „Tu patīsi redzēt vari viņ ar sirdi. Tys, kas patīsi svareigs, ar acim nav īraugams.” Ka Tovā školā vēļ nav nūtykuse sasatikšona ar Mozū priņci, roksti iz adresi: ilga13@inbox.lv!

Komentari slāgti.