5. febralī Rēzeknē tyka sasaukta bīdreibys “Latgolys Saeima” dybynuošonys saīsme. Apstyprynuoti statuti, par vaļdis prīšksādātuoju īcalts Jurs Viļums, par juo vītnīku – Andris Slišāns. Vēļ vaļdē ībolsuoti: Ilga Šuplinska, Valdis Labinskis i Arvids Turlajs.

Bīdreiba “Latgolys Saeima” par sovys darbeibys mierkim ir izvirziejuse: sekmēt Latgolys administrativuo regiona izveiduošonu, nūdrūšynuot kvalitativu diskuseju (sabīdriskūs organizaceju, pašvaļdeibu, uzjiemieju, vaļsts īstuožu i cytu īinteresātūs personu vydā), kūpeiga Latgolys redzīņa puorstuovnīceibu, latgalīšu volūdys, kulturys i socialekonomiskūs interešu aizstuoveibu.

Pyrmajā saīsmē pīsadaleja 27 daleibnīki – bīdreibys dybynuotuoji, jūs vydā ari Imants Slišāns, Mareks Gabrišs, Līvija Plavisnka, Guntis Rasims, Anna Rancāne, Aņss Bierzeņš, Veronika Dundure, Pīters Luocs, Andris Kazinovskis i cyti. Vystyvuokajā laikā tiks atkluota ari bīdreibys “Latgolys Saeima” sātys lopa škārsteiklā (saeima.latgola.lv), kurā nūtiks regularys bīdru diskusejis, kai ari kotrs bīdreibys atbaļsteituojs varēs īraksteit sovu prīšklykumu, komentaru voi ari pīduovuot realu paleidzeibu pi kaida nu daudzajim dorbim.

Pasuokumā kluot beja ari Kulturys ministre Sarmeite Ēlerte, kai ari Latvejis Republikys Saeimys deputati: Lolita Čigāne i Stanislavs Škesters, kurs ari pīkryta kliut par vīnu nu bīdreibys dybynuotuoju.

Bīdreibys „Latgolys Saeima“ vaļdes prīšksādātuojs

Jurs Viļums, latgolyssaeima@gmail.com, 26393531

Apvīneibys “Latgolys Saeima” viests pi oficialuos nūsadybynuošonys

Voi esi izdarejs vysu, lai Latgola i Latveja byutu taida, kaidā Tu gribi pa eistam dzeivuot? Ja Tu vēļ tici, ka Latveja var kliut par atteisteitu i regionaluos vierteibys (volūda, kuļtura, ļauds…) atbolstūšu vaļsti, tod aicynojam pīsavīnuot breivūs ļaužu apvīneibai „Latgolys Saeima”. Tei ir Tova īspieja pīsadaleit taidys Latgolys i taidys vaļsts veiduošonā, kaidā gribi dzeivuot pats i kaidā gribi, lai dzeivoj Tovi bārni i unuki.

Itei nav reklama. Tys ir ciļvieceigs aicynojums kūpā veiduot sovu regionu i Latvejis vaļsti iz sapruoteigim, demokratiskim, tīsiskim i gūdeigim princypim.

“Latgolys Saeima” ir sabīdriska organizaceja, naatkareigi nu cylvāka socialuo, finansialuo stuovūkļa, naatkareigi nu tauteibys voi politiskuos pīdereibys, religiskuos puorlīceibys, izgleiteibys leimiņa, naatkareigi nu dzeivis vītys i citim aspektim, kūpeiga breivu ļaužu i naatkareigu juridisku personu apvīneiba ar golvonū mierki panuokt Latgolys i leidz ar tū ari Latvejis sakuortuošonu i uzplaukumu vysuos jūmuos.

Vysleidz – lai cik mes dažaidi ļauds byutu, mes kūpā puorstuovam Latgolu i kūpā ar cytim latvīšim veidojam itū vaļsti. „Latgolys Saeima” īzastuoj par vīnuoteibu vysu latvīšu vydā myusu vaļsts atteisteibai i tūs princypu īvāruošonai, kuri ir kūpejais montuojums nu Latvejis vaļsts izveiduošonys pyrmsuokumim: 1917. gods Latgolys pyrmuo kongresa lāmums – „Mes, Latgolys latvīši, apsavīnuodami ar Kūrzemis un Vydzemis latvīšim, paturēsim sovu pošvaļdeibu, pylnu pošnūteikšonys tīseibu volūdys, ticeibys, školu un saimesteibys, kai ari zemis vaicuojumā…”

Deļ tam „Latgolys Saeima” par sovys darbeibys pamatvierteibom izvyrza: latgalīšu volūdys tīseibu i interešu aizstuoveibu, myusdīneigys izgleiteibys sistemys atbolstu, kai ari vaļsts varys decentralizacejis procesa veicynuošonu, kab nūdrūšynuotu Latgolys ekonomisku atteisteibu i latviski latgalisku Latgolu ar kulturys vierteibu nūsorguošonu nuokamajom paaudzem.

Asom darejuši da šam kotrs sovā dorba laukā i arī iz prīšku asom gotovi veļteit savu laiku i energiju Latgolys lobā, bet tagad apsavīnojam bīdreibā, kab myusu kūpeigim spākim Latgola eistyn kliutu par veiksmis stuostu – 21. godu symta īspiejom i izaicynuojumim gotovu regionu.

“Latgolys Saeima” nav politiska organizaceja, bet vīns nu bīdreibys pīnuokumim ir ryupētīs arī par Latgolys i Latvejis politiskuos vides sakuortuošonu. Vara nadreikst struoduot atsevišku politiķu voi šauru ekonomiskūs grupiejumu interesem. Lai tū napīļautu, kotra Latvejis dzeivuotuoja pīnuokums ir leidzadareit i kūpeigim spākim veiduot pilsūniski atbiļdeigu sabīdreibu.

Mes poši dareisim Latgolys, myusu vaļsts i sabīdreibys kūpeigam lobumam i praseisim cytus byut atbiļdeigim par sovim vuordim i apsajimšonom. Mes nasavteigi struoduosim i pasadaleisim ar sovom zynuošonom i pīredzi, kab Latgolys i Latvejis sabīdreibai pīduovuotu profesionalus prīšklykumus, vierteigys idejis i kvalitativu viertejumu par dažaidim sabīdriskim i ekonomiskim procesim.

Mēs grybam apvīnuot vysus eistynūs Latgolys patriotus iz kvalitativu diskuseji i kūpeigi izstruoduot pamotus tuoluokai sabīdreibys atteisteibai. Īzasaisteit “Latgolys Saeimys” dorbā teik aicynuots sevkurs cylvāks voi juridiska persona, kas aplīcynoj sovu gataveibu sasadorbuot bīdreibys izvirzeitūs princypu īvāruošonā, kai ari sovu lāmumu pījimšonys naatkareibu nu sevkura finansiala voi politiska spāka. Ari Tu vari byut bīdreibys bīdrys voi atbaļsteituojs! Tikai nu myusu kotra atseviški i vysu kūpā sasadorbuot variešonys ir atkareigs tuoluokais Latgolys atteisteibys ceļš i Latvejis vaļsts nuokūtne.

„Latgolys Saeima” atbolsta ari cytu bīdreibu izsaceitū pīprasejumu par kvalitativu, atvārtu politiku vaļsts i regionu leiminī, par vysys vaļsts vīnmiereigu atteisteibu i kvalitativys regionaluos politikys izstruoduošonu i eistynuošonu. “Latgolys Saeima” aicynoj sabīdreibu iz aktivu leidzdaleibu, aicynoj kūpā dareit aktivus cylvākus vysā Latvejā, sasadorbuot regionūs i vītejuos pošvaļdeibuos, naaizmierstūt myusu vaļsts pamatlykumu golvonū princypu – “Vaļsts vara pīder tautai!”