Trešdin, 13.julī bejušais Latvejis Valsts prezidents i jauna politiska spāka  iniciators Valdis Zatlers sasatyka ar bīdreibys „Latgolys Saeima” puorstuovim i aicynova iz sadarbeibu, kab byutu eistyna Latgolys regiona puorstuovnīceiba Latvejis Republikys parlamentā.

Ar V. Zatleru sasatyka bīdreibys „Latgolys Saeima” vaļdes vadeituojs Juris Viļums i vaļdes lūcekli Ilga Šuplinska i Valdis Labinskis. Sasatikšonys laikā tyka puorrunuoti pamatprincipi, kab myusu vaļstī eistyn nūtyktu puormainis i tyktu radeita vīnmiereiga valsts atteisteiba na tikai golvyspiļsātā, bet ari regionūs.

Iz sadarbeibu teik aicynuoti visi, kas gotovi struoduot iz leidzvierteigim nūsacejumim, nasavteigi veicynuot vaļsts atteisteibu, eistynuot īdzeivuotuoju grybu, a na šauru grupu interesis voi nazkaidys slāptys sarunuošonys. V.Zatlers aicynoj bīdreibas puorstuovus organizēt atbolstu jaunajam politiskajam spākam Latgolā i nūdrūšynuot regionā atbylstūšu puorstuovnīceibu partejis dybynuošonys kongresā.

Juoatzeimej, ka niule 10. Saeimā nav nivīna politiskā spāka, ni ari atsevišķa politiķa, kas konsekventai īsastuotu par Latgolys regiona interesem, par primaru naizvyrzūt sovys partejis īškejuos disciplinys īvāruošonu voi personeiga lobuma giušonu.

„Latgolys Saeima” skaita, ka ir daguojs laiks Latvejis parlamentā īdybynuot kvalitativu sistemu Latvejis regionu puorstuovnīceibai – ari parteju sarokstus startam Latgolys vieliešonu apgobolā ir juoveidoj i juoapstyprynoj pošim Latgolys dzeivuotuojim, deļ tam kotrs teik aicynuots īsasaisteit itymā procesā īsnīdzūt elektroniskai īsnīgumu, kas atrūnams škārsteikla lopā: valdiszatlers.lv, kai ari paralelai sasazynuot ar Latgolys regiona iniciativys grupu pa e-postu: latgolyssaeima@gmail.com Paradzams, ka vystyvuokajā laikā īinteresātī ļauds tiks aicynuoti kūpeigi sasatikt i seikuok puorrunuot kūpeigūs Latgolai svareigūs principus valsts politikys salobuošonai i regionaluos nataisneibys dziesšonai.

Kūpeigajā dorbā teik aicynuoti visi myusu regiona dzeivuotuoji, kas ir lojali Latvejis valstej, naatkareigi nu tauteibys voi runuotuos volūdys, kab raudzietu izjaukt jau godim spākā bejušū principu – „bolsoj tikai piec etniskuos pīdereibys”.

Zeimeigi, ka V. Zatlers sovā 28. maja runā jau aplīcynova Latgolys diskriminacejis faktu, kū, nasaverūt iz godim ilgstūšu valstiskā leidzīnī realizātū Latgolys saimnīciskū, kulturalū i cylvākresursu mozynuošonu, ir izalykuši naradzam i nasaprūtam centraluos varys puorstuovi.

Bīdreiba „Latgolys Saeima” jau tyka aicynuojuse atbaļsteit prīšklykumu ituo goda 23. julī kūpeigai atlaist tagadejū Saeimu i kūpeigi sagatavēt kvalitativu pīduovuojumu deļ nuokamūs vieliešonu! Seikuoka informaceja škārsteikla lopā: latgolyssaeima.lv

Lai nūtyktu eistynys puormainiss myusu valstī, kotram individam i sabīdreibai kūpumā ir juoizviertej valsts atteisteibys īspiejis, juopījem lāmums i juosareikoj!

Seikuoka informaceja:

bīdreibys „Latgolys Saeima” vaļdes vadeituojs

Juris Viļums, tel.: 26393531