Augusts Egluojs

Šudiņ, bārns, sev egleiti dedz spūžu

Šudiņ, bārns, sev egleiti dedz spūžu,
Verīs, kai aiz lūga snīdzeņš kreit, —
Naprosi, deļkuo nav zīmā rūžu,
Breinums leluokais tik atnuoks reit.

Šudiņ, bārns, ver vaļā sātai vuortus,
Duru prīškā nūmet skujeņu,
Nuoks pi teve, apgaismuodams pruotu,
Dīva Dāls pa boltū celeņu.

Nasabeist, ka nakts ir kaidreiz baiga,
Zīmys soltums puoruok styndzynūšs,
Vysu uzvar mīlesteiba maiga,
Saulis smaids ir vīnmār spierdzynūšs.

Šudiņ, bārns, sev egleiti dedz spūžu,
Gaismu, gaismu sovā sirdī tver,
Naprosi, deļkuo zīmā navā rūžu,
Tova ticeiba tev zīdus vaļā ver.

1936

*

Marta Skuja

Svātkūs

Maņ spuldzi īdegt rūka nasaceļ:
Vēļ telpu gaismoj tymszaļš eglis zors
Un sveču dzīsnā myrdzūšs debess zors. –
Sirds šymā mīrā mirkli veļdzis smeļ.

Un lyugsna atplaukst nūgurušā vaigā:
Lai nūmūdā par tevi klusais gaismys gors,
Par tovim celim tuolā tundrā, taigā.

1943. XII

*

Konstantīns Mednis

Zīmassvātkūs

Bazneicu tūrņūs svātreitu zvona,
Pasaulī Pesteituojs nuocs.
Ikvīnā sātā prīcu jau mona —
Pa pasauli Kristus staiguot ir suocs.

Dabasu māmeņ, pajem šū Kristu,
Mūceitu, vojuotu, pi krysta systu!
Lai grieceigū pasauli pesteit Jis nuoktu,
Dvēselēs myužeigū gaismu degt suoktu.

Bazneicu tūrņūs svātreitu zvona,
Pesteituojs pasaulī nuocs.
Ikvīnā sātā prīcu jau mona —
Pa pasauli Pesteituojs staiguot ir suocs.

2000

Kartenis: Viļānu nūvoda Mukuļu dzeraune 2009. goda zīmā.

Autore: Ilze Sperga