Snīga ailenis III

Andrivs Jūrdžs

Zīmys snīgs

Lieni, lieni, vīgli, vīgli
Snīgs nu gaisa laižās žigli.

Ap muojom, kūkim pliešās
Un kai zvaigznis nūsalaiž.

Boltu, meikstu vylnuoneiti
Zīmys muote kluoj zemeiti.

Lai tuos solna natraucātu,
Sylti viņa puorgulātu.

Pajem, snīdzeņ, kliepī duorgā
Tūs gryudeņus zīmā borgā.

Apsedz teirumu apsātu,
Lai vasali puorgulātu!

.

Ontons Slišāns

Snīg

Snīgs snīg.
Bolts viejs nas sveicīņus
nu zīmelim
i solda korstuos dūmys,
i vuordus naizsaceitūs
jis apsadz aizmierstīnis sagom,
zīmeļmeitom izraksteitom
ausekleišīm spūžim,
gaišom sauleitem
i myrdzūšajīm zvaigžņu celim,
pa kurim senī spākaveiri
staigoj apsnyguši
ar aizmierstīnis
boltū snīgu…

Snīgs snīg.
I apsnīgu es pats
pa mozeņkam,
i atpalīku atpakaļ
pa mozeņkam
nu laika skriejīņa,
kur vieji pyuš –
iz prīšku viņ, iz prīšku viņ…

Snīgs snīg
i pasauļs nūsamīrej,
sasaruovs
zīmys guleišonai soltai…
a mož ka —
Myužeibys…

2003

.

Juoņs Ryučāns

Zīma

Pi nabolta ziņuojumu dieļa ar modernizātū
skovuotuoju dasprausta viestu eile ar diagramom.
Boltajam snīgam kas kreit nu gaisa voi dabasu
dorba grafiki i nūdūmuojumi ir cīši tuolīmūši.
Snīgaveirs nūsabaruojs kai luova nūbāg ar
registracejis numeri dagunā jo nav atrads iz dieļa
puortraukumus deļ meikstūnis.
Tehniski izgleituota i ar atstaruotuojim apreikuota
šmuka īlu slauceituoja drūšai lauž snīgapuorslu
zorus i svīž kaimineicys zonā lai tei nauzvarātu
slūtu skaistumkonkursā i nabyutu plana puorpiļdis
pyrms atīmūšuos snigšonys.

2005

Kartenis: Viļānu nūvoda Mukuļu dzeraune 2009. goda zīmā.

Autore: Ilze Sperga

Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]