Zīmyssvātku ailenis IV

Ontons Skrynda

***

Ak, cik jauka un cik klusa
Zīmassvātku nakts!
Šamā naktī mīrs un dusa
Vysu zemi sadz.
Debesīs cik zvaigznis skaistys
Klusi, jauki mirdz!
Tai ar mīlesteibu laistuos
Vysu ļaužu sirds.
Reitā agri tūrņūs zvoni
Dusu, mīru trauc;
Kai uz Betleemi goni,
Bazneicā ļauds brauc.

1913

.

Augusts Egluojs

Kūču dīnys vokors Latgolā

Tāvs nu peļnis jau atbrauce vakar,
Šudiņ sātu sakūpem mes,
Meitinis speiguļus egleitē sakar,
Lai tei breinumu zīdim zīd.
Vactāvs iz pierti nas kyupūšus spaņus,
Padusēs sytuši boltus saiņus,
Kaimiņu puiši uz pierti šur brīn.
Ruņceits, saūdis cepešu smaržu,
Nu kliets jis tagad uz ustobu nuok,
Kur meitas jau nūrauga peiraga garšu,
Juos Svātku dzīsmis skaistuokuos muok.
Bet māmeņa vacuo jau goldā līk sīnu
Un puori tam boltu goldautu kluoj;
Zylgonā lūgā redz zvaigzneiti vīnu,
Un saime pi vokora lyugšonys stuoj.
Tāvs izdola vysim pa kaladai vīnai,
Kū varganists atvede viņnedeļ jau,
Tod suocās mīlasts par gūdu šai dīnai,
Un saiteitom kūčom un madu vēļ kluot.
Vactāvs niu stuosta par dabasu vuortim,
Tūs atvārtus Svātku nakti tik redz,
Un eņģeļu pulkus aiz muokūnim suortim,
Jī mīra zvaigzni pasauļam dadz.
Pesteituojs pīdzimis staleitī klusā,
Pat iudiņs okuos klivis tod solds,
Un dzidrajūs dabasūs zvaigžņuotā vaigā
Ir Svātku nakt’ saskotams putnu ceļš bolts.
– Tai vactāvs vēļ stuosta… Ar lyugšonu klusu
Muote pi bārna guļtenis īt,
Ar breinumu sapnim bārns aizīt iz dusu,
Tam gurdani plaksteni aizaver cīt.
Tāvs aizīt vēļ reizi pabaruot zyrgu
Un zvaneņu atrūn, pi ilkša kū sīt;
Caur snīgpylnu sylu iz bazneicu boltū
Byus Biereišam, komonuos ījiugtam, skrīt.

.

Aleksandrs Garančs

Klusums

Nakts mīrs snauž dzili pīsnygušūs laukūs,
I klusums solts ar mieness gaismu staigoj
Pa snīga vyzuleišim drabūšim,
Pa kūku zorim bolti myrdzūšim
Ar zylu, zylu zvaigžņu vizmu vaigā.

Puor snīgūs īgrymušim muojūklim,
Kur lūgi raisa vīntuleigu gaismu,
Puor pazarem, kur vuovereitis snauž,
Tys boltus sapynus izkaisa i auž,
Ar zvaigžņu myrdzu, snīga dzierkšu kaismu.

Sleid kluss jis puori azarim i upem,
Kur straumu namīrs dzili ladā kolts
I plašums sastiņdzs breiniškeigi laistuos,
Kur sudobrainys gaismys straumis saistuos! –
Par vysu aužās zīmys klusums bolts.

Kartenis: Bolvu nūvoda Bierzpiļs pogosta Leidumnīki

Autore: Kristīne Pokratnīce

Kalenders

Jul
15
Ūtr
19:00 Leivuona piļsātys svātki @ Leivuons
Leivuona piļsātys svātki @ Leivuons
Jul 15 @ 19:00 – Jul 19 @ 23:45
Ar pylnu svātku programu var īpasazeit ITE.
Jul
17
Cat
19:00 Izruode “Mazpiļsāta” @ "Ulbrokas pērle"
Izruode “Mazpiļsāta” @ "Ulbrokas pērle"
Jul 17 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Jul
18
Pīk
all-day Vikys Ekstys izstuode “Bēres Slo... @ galereja "Alma"
Vikys Ekstys izstuode “Bēres Slo... @ galereja "Alma"
Jul 18 all-day
Galerejā “Alma” byus apsaverama Reigys Fotografejis bienalis “Next 2025” programā īkļautuo Vikys Ekstys personalizstuode “Bēres Slobodā”. Izstuodis kuratore ir Astrīda Riņke. Dokumentalū video par ituos izstuodis dorbu kopiešonys procesu analogajā foto laboratorejā taisejs Kristians Fukss. [...]