Zīmyssvātku ailenis V

Augusts Egluojs

Svātku naktī

Syla smarža vysuos sātuos staigoj,
Bolts par vysu zemi kluojās snīgs.
Tymsa nakts, bet zvaigznis spūžuok zaigoj,
Steidz iz sātu kotrys celinīks.

Cylvāks, tu, kam dzeive tymsys pylna,
Šūnakt rūkys zvaigznem pretim ceļ;
Aizmierst šaubys, aizmierst vysas mūkys,
Smeļ šū gaismu sovai dvēslei, smeļ!

Tici reitdīnai un tici tai bezgola,
Dīzgon skuma tovā dzeivē kruots,
Šūnakt dzyma Tys, kū krystā kola,
Bet kas augšancēlēs apskaidruots.

Syla smarža vysuos muojuos staigoj,
Bārns pi egleitis ar sanū dzīsmu stuoj;
Vīna zvaigzne šūnakt gaišuok zaigoj,
Gaismys straumi puori zemei kluoj.

.

Aleksandrs Garančs

Svātku naktī

Vīgli, lieni laižās snīga puorslys,
Vīgli kamanenis meikstā snīgā sleid.
Dzierd nu dīvnoma, šurp zvoni skaņ,
Viesteidami Betleemis svātū ziņu…
Tymsai cauri gaismys straumis veid.
Sirds tik klusi, klusi lyudzās maņ:

Smeļ šū svātumu i nes sev leidza
Cauri dīnom, moldu naktim, glyuņ kur grāks;
Nes šū skaidreibu kai saulis storu.
Šymā naktī Pesteituojs mums pīdzims.
Dzeivis tymsā voda lai Juo spāks
Vysus myus iz gaismys pavasari.

.

Jurs Pabierzs

Bārni Zīmyssvātku reitā

Bārni seņ jau svātku gaida –
Tod tim prīca, laime smaida!..

Un raug, snīga sagā teits,
Atnuok Zīmyssvātku reits.

Suocās jaukuo prīcys dīna,
Nūskumuša nav nivīna.

Ļauds iz bazneicu īt, brauc, –
Tur tūs zvona skaņas sauc…

Bārni, muojā palykuši,
Vysi kūpā saguojuši,

Jautri stuojās duorzeņā –
Laiku kavej puļceņā.

Vini, jautri skraideidami,
Lelā prīcā klaiguodami,

“Pūdus dauza”, “Vystys giun”,
“Brauc iz mežu”, “kūrpis šyun”,

“Gona vuškys”, “kumeleņus”,
“Skustus pierk”, “mej gredzineņus”,

“Kriejumu smeļ”, “mīstūs brauc…”
“Peļu pulkā kači sauc…”

Jautri, breivi skraideidami,
Jaukas dzīsmis dzīduodami,

Loksta vini – prīceigi.
Bezryupeigi, laimeigi.

Piļneibu tī vysur mona –
Vysa teik jim, vysa gona:

Vysu dūd jim Svātku reits,
Boltā snīga sagā teits.

1911

Kartenis: Bolvu nūvoda Bierzpiļs pogosta Leidumnīki

Autore: Kristīne Pokratnīce

Print Friendly, PDF & Email

Kalenders

Jun
16
Svā
all-day Izstuode “Juoņs nu Dzeņagola” @ Latgolys Kulturviesturis muzejs
Izstuode “Juoņs nu Dzeņagola” @ Latgolys Kulturviesturis muzejs
Jun 16 all-day
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]
all-day Jevgenija Bondarenko izstuode “D... @ Latgolys Kulturviesturis muzejs
Jevgenija Bondarenko izstuode “D... @ Latgolys Kulturviesturis muzejs
Jun 16 all-day
Muokslinīks Jevgenijs Bondarenko ir riezeknīts i ar gleznīceibu nūsadorboj nu Latvejis Muokslys akademejis Latgolys filialis absolviešonys 2011. godā. Gleznuotuojs aktivi īsakļaun muokslys dzeivē, pīsadolūt kūpejuos Latgolys muokslinīku izstuodēs i plenerūs. Sovu pyrmū personalizstuodi “Maiguma ārprāts”[...]
all-day Karīnys Ludbuoržys izstuode “Zie... @ Latgolys Kulturviesturis muzejs
Karīnys Ludbuoržys izstuode “Zie... @ Latgolys Kulturviesturis muzejs
Jun 16 all-day
Riezeknīte Karīna Ludbuorža piec garuoka laika pūsma, kod turpynuoja muokslys studejis Vuocejā doktoranturys programā, otkon pīduovoj sovu dorbu izstuodi Latgolys Kulturviesturis muzejā. Muokslineicys jaunuokī dorbi aplīcynoj juos interesi par viesturi i vysaidu pasauļa tautu mitologeju.[...]