Deputata Jura Viļuma eiss atsacejums iz atkluotū viestuli

Pyrma šaļtenis LaKuGa publicieta “Latgolys patriotu” atkluotū viestuli LR 11. Saeimys deputatam Juram Viļumam. Šudiņ atguojuse atbiļde:

.

.

Vasals, Jur, i sveicynuoti LaKuGys skaiteituoji, kam interesej!
.
Prīca par Tevis sagatavietū viestuli, iz kuru raudziešu eisumā pīraksteit atsacejumu:
.
Ekonomika i kuļtura ir savstarpeji svareigys jūmys, tikai ekonomiskais pīaugums nagluobs ni Latgolu, ni Latveju, byus vajadzeigs ari patriotisms – taitod ari latgaliskums. Ka natici maņ, tod paskaiti Ontona Slišāna gruomotys!
.
„Latgolys Saeima” ir bīdreiba i tuos apskotamī i aizstuovamī vaicuojumi teik vierteiti demokratiskā kuortā, ari ekonomiskī vaicuojumi ir dīnys kuorteibā – dīvamžāļ latgalīšu leidzšinejuo sadrumstaluoteiba (taitod ari kūpeiga redzīņa tryukums) nav veicynovuse sistematisku Latgolys regiona interešu aizstuoveibu.
Asom izkaiseiti pa pasauļu, kai ari asom izkaiseiti sovuos dūmuos, prīšklykumūs, bīdreibuos – nav leidz ar tū ari resursu, lai uzturātu spieceigys navaļstiskuos organizacejis. Ite juoatzeist, ka ari „Latgolys Saeima” ir tikai napylnu godu pastuovejuse i visi leluokī dorbi tai vēļ ir prīškā.
.
Par munim dorba pīnuokumim Latvejis Republikys 11.Saeimā – Nacionaluo atteisteibys plana izstruodis i īvīsšonys uzraudzeibys komisejā taišni tagad suoksīs leluokais dorbs, kur aizstuoviešu reģionāluos atteisteibys ideju kai vysys Latvejis prioritati nuokamajam planavuošonys periodam. Vaļsts puorvaļdis i pašvaļdeibu komisejā izskateitajim vaicuojumim var īsapazeit škārsteikla lopā: http://titania.saeima.lv/livs/saeimasnotikumi.nsf/webComisCat?OpenView&restrictToCategory=11|Valsts%20p%C4%81rvaldes%20un%20pa%C5%A1vald%C4%ABbas%20komisija&count=1000
.
Par konkretu prīšklykumu virziešonu nu sovys pusis par Latgolai svareigim vaicuojumim niu konsuļtejūs ar Latgolys pašvaļdeibu, planavuošonys regiona administracejis, augstškolu, uzjiemieju puorstuovim, kai ari ari prostajim ļaudim.
.
Vēļ struodoju ari Pīprasejumu komisejā i Parlamentaruos izmekliešonys komisejā par Latvejis Kruojbankys vaicuojuma izskatiešonu.
.
Juoatzeist, ka 2012.goda vaļsts budžets pījimts atbylstūši da tam sagataveitajim Finanšu ministrejis principim, kurim ZRP ilgtermiņā navar pīkrist, deļ tam jau tagad pakuopeniski suoknam dorbu pi nuokamuo goda budžeta, kab tys jau nu pyrmsuokumu byutu izstruoduots īvarojūt ZRP redziejumu par vajadzeigajom izmaiņom leidzšinejā kuorteibā.
.
Saikne ar vālātuojim. Kotru pīktdini (ari sastdini) es i muns kolega Gunars Igauņs braucam iz Latgolu i raugam tiksīs ar piec īspiejis plašuoku īdzeivuotuju skaitu i jūs puorstuovim.
.
Nagrybu tukši filozofēt par „vajadzeibu koč kū dareit”, bet aicynoju struoduot pi konkretim prīšklykumim, pi kuru eistynuošonys tod ari kūpeigi dareit.
.
Na atolguojuma dieļ asu īsasaistejs politikā. Leidzeigu olgu ar gūdeigu dorbu varieju nūpeļnēt ari Latgolā, deļ tam aicynoju kotru Latgolys aktivu īdzeivuotuoji apdūmuot sovu īspiejamū īsasaisteišonu politiskajūs vaļsts procesūs, kab nuokamajā 12. Saeimā Latgolai byutu vēļ vairuok eistynu sova regiona puorstuovu – byušu tikai prīceigs, ka jī vysi byus gudruoki, lobuoki i varbyut ari šmukuoki par mani. Muns mierkis vysod ir bejs dzeivuot pylnvierteigu dzeivi sovā dzymtajā nūvodā, kū ari ceru ar laiku pīpiļdeit.
.
Asu īsasaistejs politikā tikai ar vīnu mierki – lai Latgolys regionam byutu puorstuovnīceiba LR Saeimā, kai ari lai tys kliutu vēļ leluoks i leidz ar tū ītekmeiguoks Latvejis vaļsts politikā. Ka kaids uzskota, ka muna darbeiba LR Saeimā ir naatbiļsteiga, tod aicynoju raksteit munai partejai – i, ka tuos Latgolys bīdri pīpraseis, tod asu gotovs nūlikt sovu deputata mandatu i dūt īspieji nuokamajam Latgolys vieliešonu apgobola kandidatam lobuok pīruodeit sevi Latgolys interešu aizstuoviešonys dorbā.
.
Aicynoju iz prīšku drūšai raksteit konkretus prīšklykumus i vaicuojumus iz e-postu: juris.vilums@saeima.lv voi ari pīzvon iz Tev labi zynomū munu numuri, kū, starpcytu, var atrast ari škārsteiklā: 26393531
.
Plašuoks redziejums par pādejuo laika aktualuokū temu – izmaiņom akcizis nūdūkļa lykumā i tūs saisteibu ar protestim Latgolā – var īsapazeit ite:
http://jureits.wordpress.com/2012/01/25/grozijumi-likuma-par-akcizes-nodokli-un-ar-to-saistitie-protesti-latgale/
.
Ar cīnu,
LR 11.Saeimys deputats Juris Viļums

Print Friendly, PDF & Email

Komentari

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]