Rēzeknis piļsātys dūmis Kulturys puorvaļde izsludynuojuse kasgadejū kuortejū Mozūs kulturys projektu finansiešonys konkursu ar projektu īsnīgšonys termeņu leidz 17. februram.

Rēzeknis piļsātys dūmis Kulturys puorvaļde Mozūs kulturys projektu konkursu izsludynoj divejis reizis godā – ar dasacejumu īsnīgšonu leidz 1. februaram (par projektu realizacejis laiku nu marta leidz juļam) i 1. juļam (par laiku nu augusta leidz decembram), nu itymā godā leidz ar vāluoku budžeta pījimšonu, projektu īsnīgšonys termeņš pagarynuots leidz 17. februaram.

Konkurss var pīsadaleit gon juridiskys, gon fiziskys personys, kurys dasoka kulturys projektus i ituo konkursa ītvorūs tūs realizej Rēzeknē. Īsnīdzamuo projekta rezultatam juobyut sabīdriski nūzeimeigam Rēzeknis piļsātai.

Projektim juoatbiļst vairuokim kriterejim: tīm juobyut aktualim Rēzeknis piļsātai i tuos īdzeivuotujim, idejom – originalom i ilgtspiejeigom; aprokstā juobyut skaidri izkluosteitai projekta realizacejis gaitai; juoparadz ari projekta rezultatu pīeimameiba plašai mierķauditorejai.

Pošvaļdeiba var daškiert leidzfinansiejumu leidz 50 % nu īsnīgtuo projekta kūpejuo budžeta. Daškiertuo leidzfinansiejuma apjūms nav mozuoks par 150 i nav leluoks par 2000 latim, projekta kūpejam budžetam navādzātu puorsnīgt 5000 latu.

Mozūs kulturys projektu finansiešonys konkursa nūlykums idasacejuma veidlopys pīeimamys Rēzeknis piļsātys dūmis Kulturys puorvaļdē (Atbreivuošonys alejā 93, 1. stuovā, 117. kab.), dorba dīnuos nu 10 leidz 12 i nu 12:30 leidz 16 stuņžu, kai ari sātyslopā www.rezekne.lv
Rēzeknis Mozūs kulturys projektu konkursa nūlykums