Slynkums izgluobs pasauli / Interveja ar Gunti Rasimu

Pyrma nedelis tika sadaleitys Latgalīšu kulturys Goda bolvys „Boņuks 2011”. Niu apleik vysaidys runys par tū, kai beja, nabeja, kas labi, kas na tik. Piec ceremonejis LaKuGa iz interveju aicynuoja taidu kai „Boņuka” tāvu – Gunti Rasimu, kas jau catūrtū godu uzajiems „Boņuka” golvonūs organizatoriskūs dorbus. Iņtervejis viersrokstu, smejūtīs, Guntis izdūmuoja pots, i nav īmesla cīši kū ta maineit. Deļkam? Par tū skaitit vaira iz prīšku.

 

Boņuks beidzīs. Kaidys sajiutys?

Jiutūs… nu normali. Vysmoz pasuocīņa beigu faze šūgod beja taida daudz mīreiguoka kai cytus godus.

Kai sovulaik roduos ideja par Latgalīšu kuturys Goda bovu „Boņuks”?

Nu kai – dzērem ols, sēdiejom, runuojom. (smejās) Vīns nu motivatorim beja, ka cytur – laikam Muzykys Goda bolvā – kuortejū reizi izbrākieja vītejūs latgalīšus ar vairuokim dorbim i tod roduos dūma – taisom sovu, kū tī daudzi jimtīs! Suokumā tys tai ari vaira beja caur muzykys prizmu. Tod pīpeļdieja Oseits ar literaturu – ka tož vāga, i Jureits, ka vāga plašuok kulturu jimt, i tai ideja auga, auga… Pyrmā godā vyspuor daudzi nominaceju beja, bez sovys jāgys

Latgalīši kūtruoki palykuši, mozuok aktivi?

Nā, tys vaira taids maksimalisms, ka vāga vysu piec kuortys i vysim bolvys. Tāņ godu nu goda izafiļtrieja. Tādiņ tuos nominacejis, kas ir, dīzgon plaši aptver kulturu. Pyrmā godā nabeja tūs pošu foklorys, amatnīceibys. Tagad jau vyss ir drupeit nūsastabiliziejs – četri godi – bārns, kas spiej izsaceit sovu redzīni, aizstuoveit sev svareigys lītys.

Nav apnykums?

Apnykums. Nu, da. Taids drupeit ir. Nazynu… Iz cytu godu es jau daudzim soku, ka vāga na ni gluži sovu organizaceju, bet vysmoz taidu kai padūmi nu vysom organizacejom, kas ir gotovys dareit i dorbuotīs. Byutu koč pa vīnam cylvākam nu kotrys organizacejis, kas dareitu konkretys lītys. Pošam ir pylns ideju, kū i kai vēļ varātu dareit. Boņuks vys tik pajam puora mienešu nu munys dzeivis. Nasagrybātu vēļ četrdesmit godu taiseit itū pasuocīni. Kaidu reizi grybātu atīt taipat apsavārtu. Atsasāstu pādejā ryndā, vārtūs – itys slikti, itū – par kū jī sataisieja tai… pakritizēt. Forši ir kritizēt.

Kaida ir kritika?

Vysaiža ir. Ir ari objektiva. Itam pasuocīņam es cenšūs uzklausiet konstruktivu kritiku. I mes cīši asam tū jāmušs vārā attīceibā iz nominacejom, vierteišonu i iz vysa kuo. Prūtams, kotra bolva nabyus da gola ideala nu vierteišonys vīdūkļa. Voi Oskara bolva ir objektiva? Nu leluokū tīsu, da. Kaids tī prestižs jau tikt storp tim nominantim! Vysur piec tom roksta ka nominee of taids i taids gods. Bet vysys bolvys parosti vys tik beiguos ir drupeit laimis spēle. Cik tu labi muocieji pasnīgt, paruodeit. Varbyut tys pasuocīņs nabeja i cik kruts, bet tu jū uztaisieji, ka tī, kas viertej, zyna – ā, nui, taids pasuocīņs beja! Var uztaisiet idealu pasuocīni, bet, ka par tū nazyna vysi, tod – taidod da gola ideals vys tik nabeja

Kai Tev ruodīs, Latvejis kuturys sabīdreiba ir pamaniejuse, ka koč kas itaids pi latgalīšim nūteik?

Nu ir, pamona. Šūgod vysmoz dzaltonī pīrymuši. Pyrmajūs godūs dzatanuo prese gribieja nazkaidu ažiotažu sataiseit… nu nasaguoja… nav jau nu kuo sataiseit. Par tū, ka poši sev dūd bolvys i tai. Bet myusim sistema taida, ka tu nadreiksti bolstuot par tū, kur pats esi īsaisteits. Ja kaids tai vys tik izdora, viertiejums vīnkuorši nateik jimts vārā, vīnolga, cik i kai daudzi tu esi goda laikā dariejs. Maņ ruodīs, ka tys tai dīzgon labi izslādz itū lītu.

Boņuks ir klivs par taidu prestižu bolvu?

Es dūmoju, ka jau ir. Vadeituoji ceremonejis suokumā saceja, ka itei ir prestižuokuo kulturys bova latgalīšim. Prestižuokys tak nav? (smejās) Godu nu goda cylvāki arviņ vaira izzynoj, ka taida ir. Nav vaira kai pyrmā godā – kai eksperiments – kas ta tys taids ir, kū jī ir izdūmuojuši. Tāņ bolva ir ījiemuse drusku sovu vītu i cylvāku apziņā i kūpejā kulturys dzeivē. Zynu ari konkretus pasuocīņus i projektus, kas šudiņ dabuoja Boņuku, kam godu pyrma vīns nu motivatorim projekta taiseišonai taišni i beja Boņuks. Tei ir vīna nu ituos bolvys byuteibom. Vīns ir apzynuot tūs, kas ir dariejušs i izdariejušs, ūtrs – ceļt kvalitati – O, itys uzvarieja! na – Par kū jis uzvarieja? Tu uztaisi, kab cytā godā ir tei kvaitate, kab vari pasaceinēt. Lai ir taids kai stimuls, dziniejspāks. Varbyut tim, kas gryb dareit – kai līšnuo motivaceja dareit konkreti itū na cytu – ot, izdareišu i varbyut daže sajimšu bolvu! Bolva kai motivaceja tei i ir – nu sevkura redzis punkta verūtīs.

Cik aktivi ir kuturys darbininīki i jūs leidzcylvāki dasokūt nominantus?

Ni valna jī nav aktivi! Pošim juomeklej i juosaver. Grybātūs leluoku aktivitati. Tys taids lels akmiņs kulturys darbinīku lauceņā Latgolā vyspuor. Maņ jau ruodīs, ka itys pasuocīņs byutu juotaisa Latgolys nūvodu kulturys darbinīkim. Tys byutu logiski. Principā es doru jūs dorbu. Tik jim par tū moksoj, maņ namoksoj. Taida starpeiba. Šūgod nā, paguojušā godā, kod beja nazkaida kulturys darbinīku saīšona, es jim prezentieju Boņuku, stuostieju vysu, saceju, ka taisom kūpā, īsasaistit, atteistom i tai tuoļuok. Jī smaidieja – molocs, ka dori, nu i vyss. Nu maņ ruodīs, tys ir pa lelai daļai jūs dorbs, kuru koč deļ kam jī navar ci nagryb dareit… Vysa pamatā jau vaira gribiešona.

Kur tu pots rūni tū gribiešonu?

Cyti paboksta, deļ tuo, ka maņ slynkums. (smejās)

Nu na tik Boņuku organizēt, bet vysom latgaliskom aktivatatem…

Motivaceja. Vysam koč kaida motivaceja, mozi mierkeiši, kurus tu izvirzi. Ka tu jūs sasnīdz, ir gandariejums i rūnās jauna motivaceja koč kū dareit. Saguoja, nasaguoja. Nasaguoja – hop, dūmoj, deļ kam tai i raugi pamaineit, kab saītu.

Bet varbyut taišni latgaliskajā. Daudzi jau izavielej nadareit…

Nu vīnkuoršuok! Varātu jau angliski koč kū taisiet ci cytaiž. Nu tys nabyutu iņteresna. Cylvāks dūmoj, runoj i kū tī lauztīs cytā volūdā. Varbyut tys ir slynkums? (smejās) Da, saīt, ka slynkums vierza iz prīšku. Logiski saīt, ka slynkums runuot i dareit cytuos volūduos.

Pīktais Boņuks byus?

Moš i byus. Drūši viņ, kur liksīs. Itam mes dabuojom drusku naudys nu Kulturkapitala fonda caur Latgolys regiona Atteisteibys agenturu. Tys taids lobs pamats, lai izdareitu pamatdzelys i nabyutu otkon juoskrīņ pa pašvaļdeibom, kab īdūd kaidu latu. Lels paļdis tom, kas vys tik pabolsta! Rēzeknis pašvaļdeibai, par tū, ka nav maņ tuoli aizīt… Cytys… ka na ar dorbu, varbyut koč drupeit vaira finansiali atbaļsteit… Soka, ka navar, „sistema” taida. Nu pots struodoju pašvaļdeibā i zynu, kaidys „sistemys” – vyss ir tikai gribiešona, ka vysu laiceigi i labi padora.

 

Karteņa – Guntis dorbūs, foto: Edeite Husare, LaKuGa

Print Friendly, PDF & Email

Komentari

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]