Februarī nūtyka akteru atlase jaunai latgalīšu kinai „Vīna vosora deļ vysu”. Niu ir zynomi atlasis rezuļtati i akteru pamatsastuovs.

Nu ituo goda maja leidz oktobrim Rēzeknis nūvoda Ūzulainis pogostā nūtiks jaunuokuos latgalīšu kinys „Vīna vosora deļ vysu” fiļmiešona. Vīnu nu golvonom lūmom kinā spēlēs Andris Rudzinskis, kas ir pazeistams kai Boņuks nu Juoņa Streiča kinys „Cylvāka bārns”, kai ari Daila Ekimāne, Ilmārs Dreļs, Anita Graudiņa, Olga Jermakova, Līna Zaharāne, Ieva Stanka, Uldis Lupiks, Artūrs Butkevičs i c.

Februarī nūtykušajā akteru atlasē atsauceiba izaruodeja nacarāti lela – 58 pretendenti, fiļmietīs grybātuoji vacumā nu divejim leidz pot 76 godim. Akteru atlasē pīsadaleja vysa fiļmiešonys grupa, tuos sastuovā ir scenareja autoreis ailineicys Ingrīda Arcihoviča i Ineta Atpile-Jugane, kai ari montažys režisors Sergejs Čakāns, skona operators Vitālijs Dudarenoks, gaismys i specefektu režisors Artis Veitūls, fotografs-dizainers Edgars Pavlovskis, dekorators Kristaps Višs, muokslineica Inese Dundure, kostimu muokslineica, grimātuoja Sandija Sarkane, akteru atlasis specialists Juoņs Aleksāns i idejis autors i režisors Edgars Blinovs, kura īprīškejais režisātais projekts – kina „Latgolys laikadečs” Latgalīšu kulturys Goda bolvā „Boņuks 2011” tika atzeits par lobuokū latgalīšu pasuocīni/projektu 2011. godā latgalīšu kulturā.

Latgolys entuziastu grupa kinā gryb pastuosteit par sovu dzimtini – Latgolys, paruodūt tū, kasdīnā cieški viņ napamonom ci uztverom kai pošsaprūtomu. Kina ir baļsteita iz realim nūtykumim, kuri risinuonuos Latgolys īdzeivuotuoju kasdīnā. Eistynojūt itū projektu, tiks popularizāta Latgolys kultura, tradicejis i latgalīšu volūda vītejā, nacionalā i starptautiskā leiminī. Vīna vosora, nu kotra varūņa dzeivē tei īness kū cytu.

Kina „Vīna vosora deļ vysu” skateituojim tiks ruodeita 2013. godā.

Informaceju sagatavieja Latgolys entuziastu grupa, Laura Sondore

Karteņā – kinys uzjimšonys grupa, publicitatis foto