3. pasauļa latgalīšu konfereņce „LATVEJIS NAATKAREIBYS LAIKS — LATGOLYS ĪSPIEJA VOI IZNICEIBA“

Nu 2012. goda 9. i 10. augustā Rēzeknē nūtiks 3. pasauļa latgalīšu konfereņce “Latvejis naatkareibys laiks – Latgolys īspieja voi izniceiba”.

1992. goda 11.–13. augustā Rēzeknē nūtyka 1. pasauļa latgalīšu saīts, kas pulcynuoja vysaidu nūzaru specialistus, kab puorsprīst atmūdys laika nūtykumu strategeju i izmainis, kurūs vajag Latgolys regiona atdzimšonai. Tyka pījimti lāmumi par latgalīšu volūdys vaicuojumu aktualiziešonu, regiona plašsazinis leidzekļu i gruomotu izdūšonys atbolstu, Rēzeknis Augstškolys izveiduošonu. Pasuokuma laikā tyka atkluots atjaunuotais pīmineklis „Vienoti Latvijai“.

2002. goda 11.–13. augustā tyka organizāta 2. pasauļa latgalīšu konfereņce, kuramā pījēme uzsaukumu, kū nūsyuteja Latvejis Republikys prezideņtei V. Vīķei-Freibergai, LR Ministru prezideņtam Andrim Bērziņam. Jimā tyka atzineigi nūvārtāta Vaļsts volūdys lykuma izstruode, RA nūdybynuošonys fakts, atbolsts Latgolys Kulturys centra izdevnīceibys dorbam, taipat tyka izvierzeiti bez kaviešonuos rysynojamī aizdavumi: „Latgales kultūrvēsturiskā mantojuma saglabāšana un attīstība ir skatāma nesaraujamā saistībā ar novada saimniecisko dzīvi un valsts reģionālo politiku. Laikā, kad lielākā investīciju daļa nonāk Rīgā un tās apkārtnē, izraisot Latvijas lauku izmiršanu un katastrofālu bezdarba pieaugumu, uzskatām par vitāli nepieciešamu valsts atbalsta palielināšanu Latvijas perifērijai, īpaši Latgalei, samazinot nodokļu likmes un sekmējot investīciju piesaisti.“ Uzsaukumā tyka vārsta uzmaneiba iz kuortejuos administrativi teritorialuos reformys sasteigteibu i nalabvieleibu Latgolai, juos rezultatā tyktu maineiti Latgolys kulturviesturiskī rūbeži. Bažeišonuos izaruodejuse pamatuota — piec 2009. goda reformys Varakļuonu vairs nav Latgolys planavuošonys regionā, a vairuoki Sielejis nūmalis pogosti jam ir pīvīnuoti.

Atsagrīžūt pi 2. konfereņcis uzsaukuma, var ar nūžālu saceit, ka desmit godu laikā vaļsts leiminī praktiski NIKUO nav dareits, kab apturēt lauku izmieršonu i bezdorba pīaugumu.

2012. goda 9.–10. augustā Latgolys dīnu laikā Rēzeknē notiks 3. pasauļa latgalīšu konfereņce, kuramā teik praseiti pīsadaleit zynuotnīki, pošvaļdeibu i vaļsts organizaceju darbinīki, navaļstiskūs organizaceju, plašsazinis leidzekļu puorstuovi, školuotuoji, uzjiemieji, kab kūpeigā diskusejā puorsprīst Latvejis naatkareibys laika Latgolys atteisteibys teņdeņcis i paneikuma īmesļus ekonomikā, izgleiteibys, volūdys, kulturys politikā i aktivi īsasaisteit vaļdeibys veiduotuos Latgolys atbolsta programys realizacejā.

Pīsokūt temys i rokstūt tezis konfereņcei, prosom puordūmuot i nūviertēt juos aktualitati konkretys nūzaris i Latgolys regiona atteisteibys koņtekstā. Aicynojam aktivi īsasaisteit prīšklykumu izstruodē regiona atteisteibys politikys mierktīceigai, dreizai i sistemiskai izaugsmei.

Jamūt vārā storpdisciplinarūs pietejumu pīaugumu i svareigumu ari Latgolys regiona problemu rysynuošonā, gaideisim pīsacejumu, kurī respektej itū zynuotnis atteisteibys tendeņci, kai ari padzylynuotus humanitarūs (volūdys, kulturviesturis, folkloristikys, literaturzynuotnis), socialūs (regionaluo ekonomika, demografeja, uzjiemiejdarbeiba, lykumdūšona, drūšeibys vaicuojumi i c.) i inžinerzynuotnis (vidis, informaceju tehnologejis, byuvnīceibys i c.) pietejumus.

Itamā konfereņcē pyrmū reizi byus puorstuovāti i Sibirejis latgalīši, nu jūs dzierdēsim par jūs izdzeivuošonys pīredzi 20. godu symta garumā.

Konfereņcis dorba volūdys — latvīšu, latgalīšu, angļu, krīvu, vajadzeibys gadejumā nūdrūsynojūt tulkuojumu

Konfereņcē var pīsadaleit ar referatu voi stenda referatu

Referata garums — 30 min.: 20 min. — referats, 10 min. — diskusejis
Stenda referata prezentaceja — 5 min., 30 min. — diskusejis par 3–5 stenda referatim

Konfereņcis nūtikšonys vīta — Rēzeknis Augstškola, Atbreivuošonys aleja 115, Rēzekne

Vārā jamamī laiki:

–        2012. goda 1. majs — konfereņcis pīsasacejumu pījimšona

–        2012. goda 1. juņs — organizacejis komitejis atbiļde par pīsasacejuma pījimšonu voi napījimšonu i seikuokys informacejis par Latgolys dīnom, organizatorisku preciziejumu izsyuteišona

–        2012. goda 1. juļs — težu apkūpuojums i publiciešona (da 3000 rokstu zeimu, īskaitūt atstarpis)

–        2012. goda 9.–10. augusts — konfereņcis laiks

–        2012. goda 1. decembris — rokstu padūšonys pādejais laiks konfereņcis materialu kruojumam

–        2013. gods — konfereņcis rokstu kruojuma izdūšona

 

Konfereņcis organiziešonys komiteja:

Dr. sc. ing.  Edmunds Teirumnīks Rēzeknis Augstškolys (RA) rektors

Dr. philol. Ilga Šuplinska — RA Regionalistikys zynuotniskuo iņstituta Zynuotniskuos padūmis prīšksādātuoja

Dr. sc. ing. Irena Silineviča — RA profesore

Dr. philol. Lideja Leikuma — Latvejis Universitatis profesore

Dr. habil. philol. Janina Kursīte — Latvejis Universitatis profesore

Dr. hist. Henrihs Soms — Daugovpiļs Universitatis Latgolys pietnīceibys iņstituta direktors

Dr. habil. art., Dr. hist. Jurs Urtāns — Latvejis Kulturys akademejis profesors

Dr. oec. Sandra Ežmale — Rēzeknis Specialuos ekonomiskuos zonys puorvaļdis vadeituoja

Māris Bozovičs — Latgolys regiona atteisteibys agenturys direktors

Veronika Dundure — Latgalīšu volūdys, literaturys, kulturviesturis asociacejis nūdybynuojuma vaļdis prīšksādātuoja

Inese Laizāne — Kulturys ministrejis parlamentaruo sekretare

 

Konfereņcis organiziešonys komitejis gūda bīdri:

Juoņs Buļs — Rēzeknis-Aglyunys diecezis veiskups

Aļberts Spuogis — pedagogs, dzejnīks, filozofs

Juoņs Streičs — kinorežisors, muokslinīks

Anna Rancāne — dzejneica, žurnaliste

Pīters Keišs — Rēzeknis latgalīšu kulturys bīdreibys prīšksādātuojs

Pīteikuma anketys veidlopa atsarūn RA sātys lopā: http://ru.lv/index.php?lang=lv&p=register_plk_2012

Pīteikumus konfereņcei prosom aizpiļdeit elektroniski sātys lopā voi syuteit pa postu da 2012. goda 1. maja
konfereņcis koordinatorei Ilgai Šuplinskai ilga.suplinska@ru.lv.

Posta adress:

Rēzeknes Augstskola
Atbrīvošanas aleja 90
Rēzekne, LV 4600

Print Friendly, PDF & Email

Komentari

Nūtikšonu kalendars