Tys ir bilingvals izzinis i vuiceibu materials, kas dūmuots školom, bibliotekom, nūvoda kultūrviesturis i folklorys pietnīkim i cytim interesentim. Tuo pamataizdavums – atkluot vītys sovpateibu, pasavērt iz zynomom lītom nu molys, tuos puorviertejūt, kai ari rūsynuot folklorisku dzeivis stylu i izpratni myusu dīnuos. Itymā gadejumā apzynuots tyka Dagdys nūvoda Ondrupinis pogosts.

Kina ir taiseita treis daļuos. Pyrmajā teik raksturuota kasdīna i Ondrupinis unikalitate cytu pogostu vydā, dūts ondrupenīša aproksts. Ūtrei daļa ir plašuokuo, partū ka snīdz īskotu na tik viņ Ondrupinis cylvāku tradicejuos, dzeivis stuostūs, bet izgleitoj roksta (mustura) izpratnē. Trešuo daļa ir interaktiva nūdarbeiba, kurā paskaidruots, kai izveiduot vuorda dīnys i dzimšonys dīnys rokstu. Izaruoda, ka roksts ir kotra cylvāka dzimšonys dīnys pamatā, tys iniciej sovu talantu atkluosmi i ļaun pīsatyvuot dzeivis jāgys apziņai.

Iz diska prezentaceju teik gaideiti vysi, kas pīsadaleja ekspedicejā kai teicieji, klusi nūvāruotuoji, kritiki voi atbalsteituoji. Kinys veiduotuoji pasateic par finansialu atbolstu Rēzeknis Augstškolai, vaļsts pietejumu programai „Nacionaluo identitate,” Vaļsts Kulturkapitala fondam.

Diska prezentaceja apreļa mienesī paradzāta ari Rēzeknē, bet Latgolys školu un muzeju puorstuovi tū dreiži viņ var gaideit kai Rēzeknis Augstškolys duovynuojumu.

Laura Stepiņa, RA 1. kursa programys „Filologeja” studeņte