Februara vydā atkluotu viestuli Nacionalajai elektroniskūs leidzekļu padūmei (NEPLP) nūsyutejuse bīdreiba „Latgolys Saeima”, izskotūt, ka vysmoz 2 % vaļsts apmoksuotuo raidlaika sabīdriskajūs plašsazinis leidzekļūs juoskaņ latgalīšu volūdā.

Niu, kai informej NEPLP lūceklis Dainis Mjartāns, padūme nūsyutejuse atbiļdi bīdreibai „Latgolys Saeima” saisteibā ar atkluotū viestuli par latgalīšu rokstu volūdys veicynuošona sabīdriskajūs i komercialajūs elektroniskajūs plašsazinis leidzekļūs.

NEPLP pīsavīnoj vīdūklim, ka latgalīšu volūda ir saglobojama i atteistoma, i tam sovu īguļdejumu var snīgt na viņ sabīdriskī elektroniskī plašsazinis leidzekli, nu ari komercialī plašsazinis leidzekli.

Kai nūruoda Dainis Mjartāns, apstiprynūt sabīdriskuo pasyutejuma dalis izpiļdi, kū 2011. godā dareja Latvejis Radeja, jaunais Padūmis sastuovs vierse Latvejis Radejis vadeibys viereibu apsvērt īspieju taiseit raidejumu latgalīšu volūdā Latvejis Radejis 1. programā, nu konkretuok tū varēs apsprīst, apstiprinūt sabīdriskū pasyutejumu 2013. godam.

Padūme viestulē „Latgolys Saeimai” nūruoda, ka vysu leluokuo viereiba latgalīšu volūdys veicynuošonai byutu pīvieršama taišni Latgolā, kur ari ir vysu leluokuo pamatauditoreja laidīnim latgalīšu volūdā, leidz ar tū vīna nu Padūmis prioritatem, pīprosūt sabīdriskuo pasyutejuma finansejumu 2013. godam, byus Latgolys regionalūs i vītejūs elektroniskūs plašsazinis leidzekļu atbaļsteišona, izmontojūt 71. panta ūtrajā daļā paradzātū īspieju nūdūt daļu sabīdriskuo pasyutejuma konkursa kuorteibā cytim regionalajim i vītejim elektroniskajim plašsazinis leidzeklim.

 

Bīdreibys „Latgaļu sāta” vuordā – Marika Zeimule