Kristiāna Skutele. Gaismeņa/ Naaizmierstulis jaunradis dorbu konkurss

LaKuGa turpynoj publicēt latgaliskūs dorbus nu Naaizmierstulei veļteituo Latgolys lauku školu septeituo jaunradis dorbu konkursa.

 

Kristiāna Skutele, Prīkuļu pamatškolys 7. klase, školuotuoja Diāna Bravacka

Gaismeņa

Tu ej… un speidi. Tu gaismeņu tymsumā nes…Itūs vuordus es varu saceit vysim munim meilajim rodim i saimei. Jī munā sprostajā ikdīnys dzeivē īnas syltu, gaišu i meilūšu gaismeņu. Jī maņ ir vyslobuokī, vysmeiluokī, vysdrūsmeiguokī, vyssirsneiguokī… Ja maņ jūs nabyutu, es nazynu, voi veļ spātum dzeivuot. Tymsa mani apāstum! Bet, par laimi, maņ jī ir!

Bez munim meilajim vacuokim maņa vyspuor nabyutum. Jī mani audzynoj i vuica tai, lai piec tom, kod es izaugšu, jim nabyutu kauns par mani. Es ceru, ka tūlaik, kod es izaugšu, jī varēs ar mani lepuotīs.

Munys mosenis i bruoleits ir „visforšuokī”! Lai gon cytureiz es i dusmojūs iz jim, vīnolga, sirdī es jūs mīļoju, i jī maņ ir vyslobuokī.

Vacmamenis maņ paleidz vysod. Kod i nadorbus paleidz sastruoduot i nūslēpt, bet ari nūpītnuos dzelys ar jom var sarunuot. Es zynu, ka arī vacītāvi nu muokūņu malenis pīskota mani i aizlyudz Dīveņu, lai maņ vīglys gaitys.

Puorejī meilī, lobī, gudrī radeni maņ paleidz vysod i vysod. Jī manis napamat nalaimē nikod i nikod.

Bet! Na jau es tikai jemu i jemu vysu, kū var i navar nu cytim. Paleidzēt tok cytim ar’ vajag?

Mameņai juopaleidz pušdīņu goldu sakluot. Tieteņam dryvā i pļovā juopaleidz, lai nu graudenim var gordum gordu maizeiti cept. Pļovys sīneņš juoguodoj i juodūd Bryunaļai, lai tei dūtum boltu, putojūšu pīneņu, kas jau nu bierneibys maņ cīši mīļuots i gords iraida.

Mozajai moseņai i broleišam juopaleidz vuiceitīs, lai jī augtu leli i gudri. Lelajai muoseņai vokorā guļteņa juosakluoj, lai piec ilguos vuiceišonuos jei varātum īkrist gultā i sapņuot soldus sapneišus.

Vacmameņai juopaleidz gūtenis i vistenis pabaruot i apčubynuot. Par vectietenim aizlyudzu Dīveņam, ari par jau cytūs medeibu laukūs aizguojušim kačeišim, lai jim tī byutum daudz peleišu.

Es cenšūs byut loba arī pret puorejim cylvākim. Lai gon tys dažreiz naizadūdās, bet mes tok kotrs pīļaunam kaidu klaidu?

Pasauļs ir taiseits nu miļjardim mozu luktureišu. Kotram cylvākam pīdar vīns taids luktureits. Jo mes kotrs aizdegsim sovu luktureiti, pasauļs klius gaišuoks i syltuoks pat par sauli! Es jau sovu luktureiti īdedžu. A tu sovu īdedzi voi veļ turi ozutē? Ej i speidi! Ej, gaismeņu tymseibā nes!

Print Friendly, PDF & Email

Komentari

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]