Muzeju kolegi apsamaina radūšom idejom

16. martā, kod vysā Latvejā radūšuos nedelis „Radi” laikā nūtyka pasuocīni i radūšuos darbneicys, četru Latgolys muzeju puorstuovi devēs pīredzis apmainis braucīnā pie kolegim iz Ūgri i Jākubpili.

Cikom nedelis „Radi” laikā dažaidys institucejis centēs puorlīcynuot, īdvasmuot i pasnīgt kai ba atkluojumu, ka mes kotrs asam radūša personeiba i kūpa varam radeit lobuoku šudiņdīnu i reitdīnu, tikom muzeja darbinīki sovā storpā sasadorbuoj jau ilgi, vīns nu ūtra vuicūtīs i meklejūt vyslobuokū ideju risinuojumus. Muzejūs struodojūšī apsazynoj, ka dzeivojam unikalā vītā, i pīredzis braucīņs tū kuortejū reizi aplīcynuoja.

Preiļu Viesturis i lītišķuos muokslys, Bolvu nūvoda, Ludzys Nūvodpietnīceibys i Latgolys Kulturviesturis muzeju specialisti vysu pyrma devēs iz Ūgris Viesturis i muokslys muzeju, kur pavysam napaseņ – 2010. godā – sataiseitys jaunys ekspozicejis „Leģendārā Ogre” i „Ogre – peldu un gaisa kūrorts”. Kolegi Ūgrē na viņ īpazeistynuoja ar piļsātys viesturi, nu ari atkluoja dažys niansis, kai jī atroduši viesturīskūs faktu i legendarūs stuostu kūpeigūs savejumu punktus, kab ekspozicejis byutu aizraujūšys. Juoatzeist, ka lela daļa nu mums atkluota ari faktu, kū par Ūgri da itam nazynuojom – izaruoda tei ir vacuos Reigys vīta, nu deļkuo – braucit i atrūnit atbiļdis poši, byus interesanti!

Ceļā iz sātu gastejom Jākupbiļs viesturis muzejā – Krystapiļs pilī i pavysam tīšā veidā izbaudejom gostu izjimšonus prīcys, na viņ īsapazeistūt ar muzeja kruojumu kolekcejom i piļs restauracejis gaitu, nu ari klausūtīs intrigejūšus stuostus piļs pogrobūs. Cytureiz iz Krystapiļs pili grybātu nūbraukt tymsā, jo kolegi pīduovoj specialū nakts programu, kurys laikā varūt dzierdēt ari spūku stuostus, i tū, ka kotrā muzejā taidi ir, tū gon muzeju specialisti zyna.

Piec pīredzis braucīņa ir gandarejuma i pīpiļdiejuma sajiuta, ka kotrs muzejs ir atrads daudzys idejis, kaidā veidā var realizēt tū, kas nu suoku ruodejuos „napanasams”, ir stypruok pasaruodejuse apziņa, ka profesionalu kolegu komandā var radeit i radeit…

Paļdis, kolegi, ka jius asat i ka meilat sovu piļsātu, nūvodu i Latveju!

Eipašs paļdis braucīņa organizātuojim – Preiļu muzeja kolegim.

 

Maija Upeniece, Latgolys Kulturviesturis muzejs

 

Kartenis nu braucīņa – R. Vancāne

Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]