Sasadzīduošonā pīsadaleis ap 250 dalinīku nu vairuokim nūvodim. Rēzeknis nūvodu puorstuovēs Drycānu vydsškolys „Driceiši”, Gaigalovys pamatškolys „Purineņš”, Kaunatys vydsškolys „Rāznaviņa”, Līpu pamatškolys „Liepiņa”, Nautrānu vydsškolys „Rogovka”, Rykovys pamatškolys „Mozō Rykova”, Makašānu omotu vydsškolys „Kūkleite”, Kolnazaru katuoļu pamatškolys folklorys kūpa i Jaunstrūžānu pamatškolys folklorys kūpa. Nu Viļānu nūvoda sasadzīduošonā pīsadaleis Viļānu Kulturys noma folklorys kūpa „Biteitis”, nu Rēzeknis byus atbraukuši Rēzeknis Kulturys noma folklorys draugu kūpa „Vīteri”, bet Ludzys nūvodu puorstuovēs Ludzys muzykys pamatškolys folklorys kūpa, Nirzys pamatškolys „Spryguļi” i Ludzys piļsātys gimnazejis folklorys kūpa.

Bārnu i jaunīšu folklorys kūpu sasatikšonys reizē „Putineņi šmuki dzīd” kotram kolektivs ruodeis septeņu minotu garu programu, kurā ruodeis dzīduošonu i doncuošu par putynim i jūs dzīduošonu. Taipat vysi dzīduos ari vysi kūpā, īs rūtaļuos i sasadoncuos. Planavuots, ka nūtikšonā tiks atruodeiti 16 tradicionalī daņči i rūtaļdzigys, 30 dzīsmis, 8 teikys i puosokys, 5 muzykalī prīšknasumi. Koncerta suokys iz 12:00 i meili byus gaideiti vysi apsavārtu i pasaklauseit grybātuoji.

Taipat dīnys gaitā dalinīki dorbuosīs 6 radūšajuos darbneicuos, izbrauks iz Drycanu pogosta kulturviesturiskom vītom – Ontona Matvejāna apbedeišonys vītu, Drycanu bazneicu, kur sasatiks ar draudzis bazneickungu Māri Laurecki i O.Matvejāna dzeivisbīdri Annu Matvejāni, kai ari Kakarvīšu piļskolnā byus sasatikšona, dzīduošona, rūtalis i teiku stuosteišona kūpā ar Drycanu folklorys kūpys „Bolta vīšņa” dalinīkim.

Nūtikšonu organizej Zīmeļlatgolys nūvoda bārnu i jaunīšu folklorys kūpu koordinatore Rasma Igaune i Drycanu vydsškolys folklorys kūpys „Driceiši” vadeituoja Irēna Ivanova.

Karteņā – Rēzeknis KN folklorys draugu kūpa “Vīteri”