Šudiņ, 26. aprelī, Latvejis Republikys Saeimys bibliotekā piec plenarsēdis tyka atkluota latgalīšu rokstu volūdā izdūtūs gruomotu izstuode, kur Saeimys deputati, darbinīki i gosti div dīnys var apsavērt i vacuos gruomotys nu drukys aizlīguma laika i piec juo atceļšonys, i myusu dīnu izdavumus, kas ruoda, ka latgaliskuo raksteiba ir bejuse i turpynoj byut dzeiva, kruosaina i vysaida.

Izstuode sareikuota par gūdu viesturiskuo 1917. goda (26.-27. apreļs piec vacuo stila) Latgolys kongresa 95 godu pīmiņai, kai ari izdevieja Vladislava Luoča i latgalīšu volūdys pietnīka Mikeļa Bukša symtgadis atzeimuošonai. Izstuodis mierkis ir īpazeistynuot ar Latgolys rakstnīku i publicistu dorbim, dūt īskotu par latgalīšu literaturu, zynuotniskim izdavumim i vysaidu laiku periodiku latgalīšu volūdā. Koč izstuode pavysam nalela i dūd tikai nalelu īskotu latgalīšu izdeviejdarbeibā, patīss beja saguojušūs cylvāku puorsteigums – cik daudz jums vysa kuo ir.

Kūpā latgalīšu volūdā nu 1730. goda izdūti apmāram 2000 vysaidu izdavumu, tymā skaitā, pyrmuo ābece – 1768. godā, pyrmuo vuordineica 1858. godā, pyrmais popularzynuotniskais izdavums – 1832. godā, pyrmais gruomotu bibliografiskais ruodeituojs – 1885. godā, pyrmuo gazeta – 1905. godā. Leidzeigi kai latvīšu literaruo volūda, ari latgalīšu literaruo volūda ir laika gaitā atsateistiejuse – iz pošu šaļti spākā ir Vaļsts volūdys centra 2007. godā apstiprynuotī pareizraksteibys nūsacejumi.

Eipaši itai izstuodei nu Rēzeknis atvasta nalela ekspoziceja nu Latgalīšu rakstnīceibys muzeja, kai ari izstuodeiti ratumi nu privatūs kolekcionaru kruojumu. Andrejs Svylāns izstuodis gostim varēja pastuosteit daudz interesantu faktu nu latgalīšu rakstnīceibys i gruomotnīceibys viesturis, kū vysu lobuok paruoda tuo laika avīzis, gruomotys, roksti i jūs nūsaukumi, seikys detalis, kas cytaiž paskrītu garom viereibai.

Interesenti varēja īsapazeit ari ar pādejūs godūs latgaliski voi par Latgolu izdūtajom gruomotom i latgalīšu muzykys īrokstim, kū pīduovoj bīdreiba “Latgolys Studentu centrs”. Izstuodē tyka dūts īskots leluokajā vīnā vītā apkūpuotajā vysaidu latgalīšu izdevieju izdūtūs i niu nūpierkamūs gruomotu i disku kūpā, sātyslopa http://lgsc.lv/gruomotys.

Izstuodis atkluošonā pīsadaleja Baļtinovys vydsškolys jaunīši školys direktora Imanta Slišānā pavadeibā. Jaunīši gitarys pavadejumā pīskandynuoja bibliotekys telpys ar latgalīšu dzīsmem, I.Slišāns aicynuoja mazynuot padūmu okupacejis laika radeituos sekys i atbaļsteit latgaliskuos kulturys atteisteibu i latgalīšu volūdys lītuojumu.

Izstuodi sadarbeibā ar Saeimys biblioteku reikuoja deputati Jurs Viļums i Gunārs Igauņs, juos atkluošonā pīsadaleja volūdneica Lideja Leikuma, latgalīšu gruomotu kolekcionars Andrejs Svylāns, dzejnīki Valentins Lukaševičs i Juoņs Ryučāns, LgSC puorstuovis Ilze Sperga i Kristīne Pokratnīce.

Cerīs, ka itys pasuokums Saeimys deputatim, kas puorstuov ari Latgolu i latgalīšus, deve īskotu latgaliskuos kulturys bagateibā i dažuodeibā – kai vacūs laikūs, tai myusu dīnuos.

Karteņu autoris: Lideja Leikuma i Kristīne Pokratnīce

Cyti olūti: Saeimā atklāj latgaliešu rakstu valodā izdotu grāmatu izstādi – diena.lv

Saeimā skatāma latgaliešu grāmatu izstāde – delfi.lv

Saeimys kancelejis fotografa Ernesta Dinkys kartenis: Latgaliešu rakstu valodā izdoto grāmatu izstādes atklāšana – Saeima flickr.com

Drukavuot