Aglyunā nūsasliedzs Naaizmierstulei veļteitais jaunradis dorbu konkurss

Aglyunā nūsasliedzs Naaizmierstulei veļteitais jaunradis dorbu konkurss
Marta beiguos Aglyunys vydsškolā izskanieja latgalīšu rakstneicai, dzejneicai i tautys školuotuojai Naaizmierstulei (eistajā vuordā Rozalijei Tabinei, 1890-1965) veļteitais septeitais Latgolys lauku školu rodūšūs dorbu konkursa nūslāgums.

Ituo goda tema konkursam „Tu ej… un speidi./ Tu gaismeņu tymsumā nes” jaunajim literatim beja radejuse interesi, i konkursa reikuotuoji prīcojās, ka jaunīši pīsadaleja i atsasauce aicynuojumam raksteit i dūmuot. Kai roksta Rušuonys pamatškolys 8. klasis školneica Anita Gžibovska: „Naaizmierstule beja kai saulis spaits i neizsmeļūša labesteibys i izpaleidzeibys oka ļaudim, kurūs jei satyka.”

Konkursa nūslāguma īvodā Aglyunys vydsškolys direktore Lideja Šatilova atzeimuoja: „Maņ prīca, ka itūgod jius asat izgaismuojuši Aglyunys vydsškolu i Aglyunys nūvodu!” Kai apstirpynuojums itim vuordim ir konkursa dorbu statistika – žureja, kurys sastuovā beja Aglyunys vydsškolys školuotuoja Monika Pušņakova, Maizis muzeja vadeituoja Vija Ancāne, školuotuoja Valentina Ondzule, Aglyunys internatvydsškolys direktors i nūvoda dūmis deputats Didzis Vonogs, Aglyunys internatvydsškolys školuotuoja Anita Vaivode, zeimiejumus viertieja Aglyunys vydsškolys školuotuoja Vija Kovaļova, DMV „Saules skola” gleznuošonys školuotuoja Dace Abricka i DMV „Saules skola” Aglyunys bārnu muokslys školys koordinatore Kristīne Junkele, īsapazyna ar 154 rodūšajim dorbim i 35 ilustracejom nu 28 školom dažaiduos Latgolys vītos – nu Atašīnis, Bolvim, Brīžucīma, Biržu, Ciblys, Dagdys, Dravnīkim, Gaigalovys, Gaļānim, Izvaltys, Jersikys, Kuorsovys, Maltys, Peliečim, Prīkulim, Prīzmolys, Rībenim, Rušuonys, Seiļukolna, Škeltovys, Zilupis, kai ari Aglyunys.

Sovys gaismys izpratnis idejis školāni ir pauduši vysu dažaiduokom puordūmu variacejom, nu Preiļu 2. vydsškolys 11. klasis školnīks Artūrs Livmans roksta: „Saprūtu, ka vyss ir manī – kai īšu, kai dareišu, kai speidiešu i kaidu gaismu izstaruošu…”

Tematiski 5.-7. klašu školāni raksteja par styprajim cylvākim sovā dzeivē – muoti, pi kurys var sasajust drūšeibā, audžumuoti, babu, kurei itymā dzeivē ir kai sorgeņgeļs i vuica meiļuot Dīveņu, prīca ir ari par saimi, kurymā vairojās gaisma, kai ari lapnums par Latgolu, kurā, kai izaruod, dzeivoj vysu gudruokī ļauds.

8. – 9. klašu grupā školāni pīsavierse personeibys izzinis ceļam, izeimūt cauro lobūs dorbu pasauļam, pieteja, kai Latveju var izgluobt nu „kreizis” pūsta, izteice lapnumu par myusu vaļsts gaismys nesiejim – uorstim, zemnīkim, sportistim, školuotuojim, krystamuoti Ligitu i darbeigū Natalejis kundzi, stuosteja ari par cylvāku „īškejū starojumu”, kurīs paleidz tikt puori vysom gryuteibom, jo itys pots cylvāks patīseibā ir pērle, lāpa, kurai juospeid dzeivis tymsajuos šaļtīs. Konkursa reikuotuojim ruodejuos interesanti, ka itymā grupā školāni ari pīsavierš sarunom ar eņgelim, dīnysgruomotu, sirdsgaismys nesieju māmeņu i vaciku, ar kurim var sēdēt iz pīna gaļdeņa ceļa muolā i ēst „Gūtenis”.

10. – 12. klašu grupys dorbūs beja vārojami pozitivys gaismys mekliejumi „lelajā dzeivis duorzā”, kur meit pateiceibys vuordi babai, dzeivis filozifiskys gruomotys īstudiešona. Latvejis mīlesteiba, sevs izpiete, gaismys tadeišona tymsā, meiļumvuordi mozajai muoseņai, kurei ir „suorta ūdzeņa zaļā zareņā”, kai ari izkuopšona kolnā, kur, Ciblys vydsškolys 12. klasis školneicys Solvitys Nalivaiko vuordim runojūt, „dvēsele pasaceļ spuornūs”. Skaitūt dorbus, žurejai beja prīca par tū, ka Latvejā ir cik daudzi pozitivi dūmojūšu školānu.

Žurejis viertejumā 5. – 7. klašu grupā 1. vīta tyka daškierta Santai Zukulei (Prīkuļu pamatškolys 7. kl.), 2. vīta – Loretai Adamovičai (Bruoļu Skryndu Atašīnis všk. 6.kl.), 3. vīta – Madarai Seilei (Biržu pamatšk. 6.kl.), atzineibys sajieme Nadežda Barkovska i Ilze Maksimova (obejis nu Aglyunys internatvšk. 6.kl.), Amanda Repša-Kondratjeva (Aglyunys všk. 6.kl.), Ieva Terēza Labinska (Jersikys pamatšk. 5.kl.), Agnese Patmalniece (Kuorsovys všk. 5.kl.), Megija Streļča (Kuorsovys všk. 7.kl.), Rihards Gribusts (Preiļu 1. pamatšk. 7. kl.), Kristiāna Skutele (Prīkuļu pamatšk. 7. kl.), Diāna Kazakeviča (Prīžmolys pamatšk. 7. kl.), Mareks Cakuls (Rībeņu všk. 5. kl.), Aleksandra Pīķe (Škeltovys pamatšk.7. kl.), Ērika Nagle (Zilupis všk. 5. kl.). Par ilustracejom 1. v. daškierta Katei Tumovai (Aglyunys všk. 7. kl.), 2. v. – Elīnai Madelānei (Maltys 1. všk. 5. kl.), 3. v. – Kristīnei Kovaļkovai (Aglonas všk. 7. kl.), atzineibys sajieme Loreta Čerpakovska (Aglyunys všk. 7. kl.), Agnese Japiņa (Izvaltys pamatšk. 6. kl.).

8. – 9. klašu grupā 1. vīta tyka daškierta Katrīnai Barševskai (Izvaltys pamatšk. 8. kl.), 2. v. – Astrīdai Ostrovskai (Izvaltys pamatšk. 9. kl.), 3. v. – Mārim Rimdžam (Aglyunys internatvšk. 9. kl.) i Teklai Marijai Labinskai (Jersikas pamatšk. 9. kl.), atzineibys sajieme Samanta Smirnova (Aglyunys všk. 9. kl.), Antra Mačāne i Agnese Nikandrova (obejis – Bolvu Amatnīceibys všk. 8. kl.), Viktorija Zakarkeviča i Marta Suharevska (obejis – Gaigalovys pamatšk. 8. kl.), Linda Trule (Izvaltys pamatšk. 9. kl.), Aiva Lazdāne (Jersikys pamatšk. 8. kl.), Jolanta Nalivaiko (Kuorsovys všk. 8. kl.), Zane Čerpakovska (Preiļu 1. pamatšk. 9. kl.), Laine Giluče (Prīkuļu pamatšk. 8. kl.), Ērika Gribonika i Sintija Kozule (obejis – Prīkuļu pamatšk. 9. kl.), Andra Struka (Rībeņu všk. 9. kl.), Linda Priževoite (Seiļukolna pamatšk. 8. kl.). Par ilustracejom 1. vīta netyka daškierta, 2. v. – Lindai Martinsonei (Kuorsovys všk. 8.b kl.), 3. v. – Sandrai Bulei (Zilupis všk. 8.c kl.), atzineiba – Erīnai Sladzei (Aglyunys Katuoļu ģimnaz. 8. kl.).

10. – 12. klašu grupā 1. vīta tyka daškierta Diānai Pēterānei (Aglyunys internatvšk. 11. kl.), 2. v. – Solvitai Nalivaiko (Ciblys všk. 12. kl.), 3. v. – Sanitai Dombrovskai (Aglyunys internatvšk. 11. kl.) i Liānai Putānei (Aglyunys všk. 12. kl.), atzineibys sajieme Anda Abuže (Aglyunys internātvšk. 11. kl.), Renāte Katriča (Aglyunys internatvšk. 10. kl.), Žaneta Nikiforova (Aglyunys internatvšk. 12. kl.), Rihards Savitskis (Aglyunys všk. 12. kl.), Anta Zujeva (Ciblys všk. 11. kl.), Linda Pastare i Madara Nogda (obejis – Kuorsovys všk. 10. kl.), Irita Kovalenoka i Laura Pauliņa (obejis – Maltys 1. všk. 10. kl.), Līga Sondore (Preiļu 2. všk. 12. kl.), Artūrs Livmans (Preiļu 2. všk. 11. kl.), Laura Golubeva (Rībeņu všk. 10. kl.). Par ilustracejom 1. vietu iegīve Inta Valaine (Aglyunys všk. 10. kl.), 2. v. – Irita Kovalenoka (Maltys 1. všk. 10. a kl.), 3. v. – Dace Valaine (Aglyunys všk. 10. b kl.), atzineibu sajieme Viktorija Mičule (Aglyunys všk. 10. b kl.).

Bolvys – gruomotys, sveceitis, pučis i diplomus konkursa nūslāgumā sajieme ari konkursa dalinīku izticamuokī ceļabīdri rodūšūs dorbu dareišonys ceļā – jūs školuotuoji.

Konkursa reikuotuoji soka lelu paļdis vysim atbaļsteituojim i sponsorim – Aglyunys nūvoda dūmei, izjiemiejam Arturam Gražuļam, Maizis muzeja vadeituojai Vijai Ancānei, SEB bankai, Hipoteku bankai, Rēzeknis Augstškolai, Daugovpiļs Universitatei, Aglyunys Bazilikai, Aglyunys nūvoda centralajai bibliotekai, Aglyunys nūvoda sīvīšu bīdreibai „Neaizmirstules”, prīsteram Aigaram Bernānam, Aglyunys vydsškolys vacuoku padūmei, atraktivajam muzikim, Saeimys deputatu sveicīņu nesiejam Juram Vucānam, Zvaigznei ABC i tuos vadeituojai Vijai Kilbokai, Aglyunys nūvoda UAC i tuo vadeituojai Inārai Gražulei, Andrejam Stremjanovam, SIA „Salang”, popgrupai „Mala” i gitaristim, Aglyunys vydsškolys kolektivam i direktorei Lidejai Šatilovai. Kai saceja Aglyunys Maizis muzeja vadeituoja Vija Ancāne: „Kaids lels prīks, ka vysi sponsori ir palykuši izticeigi itam konkursam!”

Pasuocīņa nūslāgumā piec kūpdzīsmis „Pi Dīveņa gari goldi” konkursa dalinīki, atbaļsteituoji i reikuotuoji puļciejuos Aglyunys vydsškolys ādamzalā, kab pi čaja kruškys aplīcynuotu gataveibu sasatikt jau 8. rodūšūs dorbu konkursā i nūslāguma pasuocīnī, kurā vysus otkon puļcēs latvīšu volūdys i literatorys školuotuoja Monika Pušņakova. Juoatzeimoj, ka konkurss sovā septeituos darbeibys godā Aglyunys vydsškolys školuotuojis Monikys Pušņakovys sirdsdorbs ir īgivs ari latgalīšu kulturys Goda bolvu „Boņuks” kai 2011. goda „Lobuokais latgaliskais pasuocīņs školā”.

LaKuGa marta mienesī publicieja konkursā īsnāgtūs latgaliskūs dorbus, kas vēļ arviņ ir puorskaitami portalā.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]