Laura Bicāne pīsadaleis jaunūs dzīsminīku festivalā

Laura Bicāne pīsadaleis jaunūs dzīsminīku festivalā

11. majā 18:00 Reigys Kulturys i atpyutys centrā „Imanta” (Anneņmuižys bulvarī 29) nūtiks jaunūs dzīsminīku festivals „Bardu pavasars”.

Itymā godā jaunūs dzīsminīku festivalā pīsadaleis Hasinta, Dinārs Gulbis, Zane Aišpure i Rūta Kergalve, Endija Štāle, Juris Mols, Līva Vilnīte, Sandra Jurberga, Skranda i eipašais gosts Kārlis Kazāks. Dzīsminīku vydā byus ari paguojušuo goda „debitante” latgalīšu muzykā (Latgalīšu kulturys Goda bolvys „Boņuks 2011” nominaceja i bolva) Laura Bicāne.

Piec koncerta pasuocīņa ūtrā daļā byus breivais mikrofons, kurā aicynuots pīsadaleit sevkurs, kuram dzīsme ir kas vairs par radejis hitu i muziciešona – kas vaira par izklaidi. Pasuocīņa ūtruos dalis suokuos iz sasadzīduošonu aicynuos austrysbārni i tod pateikamā, naformalā nūskaņā sovys dzīsmis varēs dzīduot kotrs, kam byus leidza gitara i sovs dzīšmu pyurs.

Jaunūs dzīsminīku festivals „Bardu pavasars” radeits ari ideju popularizēt dzīsminīku kusteibu jaunīšu vydā i atkluot klauseituojim jaunus talanteigus latvīšu dzīsminīkus. Na mozuok svareiga nūzeime ir idejai veicynuot jaunūs dzīsminīku rodūšumu i dūt īdvasmu i prīcu klauseituojim radeit pošim. Vyss var byut – kaidam klauseituojam itys festivals byus poša rodūšūs spieju i talantu atkluosme.

Vīns nu pyrmūs festivalu „Bardu rudiņs” organizatorim Zigmārs Kristsons, kas ilgus godus organiziejs ari Latgolys dīnu Breivdobys muzejā, sovulaik dzīsminīku radeituo sauce par „folku – muzykys stilu, kurā golvonuos izpausmis ir bolss i pavadūšais muzykys intruments, parosti – bolss i akustiskuo gitara. Nu bards ir muzikis, kas spielej i dzīž folku, īrosts dzīž sovu individualu repertuaru, pots sovā eipašā spēlis manīrē i intonacejā. Bardu muzykaluo kultura ir cīši demokratiska i izteikti naformala. Latvejā barus reizem sauc par folkmuzikim, reizem par dzīsminīkim.”

Jaunūs dzīsminīku festivalu „Bardu pavasars” reikoj Reigys Kulturys i atpyutys centrs „Imanta”, atbolsta Reigys dūmis Kulturys, izgleiteibys i sporta departaments i Austrys bīdreiba.

Īejis moksa iz pasuocīņu – 2,00 Ls.