Divys filmys par latgalīšu folkloru i literaturu

Divys filmys par latgalīšu folkloru i literaturu

Ituo goda 10. majā plkst. 17.00 Rēzeknis Augstškolā (RA, Atbreivuošonys alejis 90 zālē) studentu zynuotniskuos konfereņcis nūslāgumā nūtiks divu muoceibu filmu prezentacejis: „Ondrupinis roksti” i „Laiku i myuža roksti”.

DVD „Ondrupinis roksti” (scenarejs I. Šuplinska, video rež. M. Justs) ir RA folklorys ekspediceju cykla par folklorys nūzeimi myusu dīnuos trešais izdavums. Pyrma ituo ir izdūti DVD „Cyblys meiklis” (2009) i „Aulejis anekdoti” (2010). Tys ir bilingvals izzinis i vuiceibu materials, kas dūmuots školom, bibliotekom, nūvoda kulturviesturis i folklorys pietnīkim i sevkuram interesentam.

Filma ir veiduota treis daļuos. Pyrmajā daļā teik raksturuota Ondrupinis kasdīna i unikalitate cytu pogostu storpā, dūts „ondrupinīša” aproksts. Ūtrei daļa īpazeistynoj ar dobā i cylvāku dzeivē asūšajim rokstiem (musturim), bet trešuo daļa ir interaktiva nūdarbeiba, kurā paskaidruots, kai izveiduot vuorda voi dzimšonys dīnys rokstu. Izaruoda, ka roksts ir ari kotra cylvāka dzimšonys dīnys pamatā, tys var byut par pamatu poša talantu i dzeivis „misejis” izpratnei.

Dokumentaluo filma „Laiku i myuža roksti” (rež. V. Ivdris, video rež. M. Justs) ir veļtejums latgalīšu rakstnīka Ontona Rupaiņa dzeivei i daiļradei. Filma atkluoj O. Rupaiņa personeibys i literaruos dzeivis spylgtuokuos nūrises, demonstrej O. Rupaiņa nūzeimi kai romana, tai drāmys žanru atteisteibā latgalīšu literatūrā, ļauj izbaudiet autora dialoga ritiejumu juo dorba dramatizejumūs. Filma viestej na tik par vīna autora dzeivi, bet atkluoj viesturiskū kontekstu, kas svareigs latgalīšu literaturys „zīdu” laika (1930–1944) i trymdys pūsma raksturuojumam.

Diska prezentācijā ir gaideiti vysi, kas interesējās par latgalīšu folkloru, literaturu, kulturys viesturi. Filmu veiduotuoji pasateic par finansialu atbolstu Rēzeknis Augstškolai, vaļsts pietejumu programai „Nacionālā identitāte,” Vaļsts Kulturkapitala fondam, Latgolys regiona atteisteibys agenturai, latvīšu katuoļu studentu i akademiķu apvīneibai „Dzintars” i vysim, kas paliedzēja filmu veiduošonā.
Diski tiks duovynuoti školu, muzeju, bibliotēku puorstuovim.

Ilga Šuplinska, idejis autore

 

Karteņā – Ondrupinis lauku sāta, muzejs, karteņa nu www.viss.lv

Kalenders

Feb
10
Pyr
18:00 Starpbrīdis – Andrim Keišam 50 @ Muzykys noms "Daile"
Starpbrīdis – Andrim Keišam 50 @ Muzykys noms "Daile"
Feb 10 @ 18:00 – 20:00
Andris Keišs: “Jau divdesmit ostoitū godu es i iz skotivis, i kameru prīškā izdzeivoju svešys dzeivis. Tys aizjam lelu daļu munys dzeivis. Ka vokorūs, izruožu laikā, tuos svešuos dzeivis teik dzeivuotys, tod nu reitu mieginuojumūs[...]
19:00 Izruode “Mazpiļsāta” @ Valmīrys kulturys centrys
Izruode “Mazpiļsāta” @ Valmīrys kulturys centrys
Feb 10 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]