Bet es vēļ napasadūdu / Dūmu pylni pogolmi. Majs

Bet es vēļ napasadūdu / Dūmu pylni pogolmi. Majs

Bet es vēļ napasadūdu. Munys kvāluokuos pavasara dūmys kliust realitate. Tik uotri jei pagaist! Es jai pīsakeru. Bet nikas mani naīvainoj. Var jau byut, ka es vīnkuorši najiutu. Muns suopu krincs ir lels. Kurš mani pamūdynuos nu bezmīga? Es īvāroju kotru pīturu. Nikas napaīt maņ garom napamaneits. Es sevis vairs napazeistu. Es varātu staiguot cauri sīnom. Es varātu staiguot pa iudiņs viersu. Es varātu skaiteit Tovys dūmys. Bet es izavālūs naskaiteit. Par tū, ka es Tevi mīloju. Kai nivīnu cytu. Kas tuos par bultom, kas naīvainoj? Kas tuos par bultom, kas naatstuoj rātys? Bet suop vys tik dzili sirds pogolmūs. Kur Tu jau bosom kuojom ībridi. Pavasara elpys puorjimts. Kai mozs bārns prīcuojīs par pļavu, izbaudieji rosu. Es nūteikti jiemu nu Tevis. Bet atdevu vēļ vairuok. Tai atguoja treis reiti. Vīnu nu jim es sagaidieju osoruos. Pogolmā nūleja leits. Aizskoluoja Tovys pādys. Bet es vēļ napasadūdu. Es cereibā tierpjūs. I varavīksne ap sauli kai dereibys zeime. Es sevi vaicoju. Deļkuo es nikuo navaru padareit? Deļkuo muni pogolmi Tev atvārti i Tevi gaida? Es varātu likt leitam napuorstuot leit. Es varātu atsyuteit zibiņus i krusu. Bet es tū nadoru, par tū, ka es Tevi mīļoju. Kai nivīnu cytu. Lai izsaceitu vuordim, es klusai čukstu. Tik klusai, ka poša nasaprūtu. Par tū gon nasabreinoju. Tikai apbreinoju tū spāku, kas myusus saleimej. Nasaraunami. Myužeigi? Varbyut. Es beidzūt pasarakstieju dzeivis leigumā zam pādejuo punkta. Tys beja – dzeivē nikas nakļiust piļneigi skaidrs. Ir juopīrūn pi pastuoveigys nazinis. Patīseibā tys nimoz nav šausmeigi, tys ir pat aizraujūši. Ar naziņu es Tevi uzjiemu. Ar naziņu es Tevi palaidu. Ar naziņu es Tevi vēļ arviņ gaidu. Es vēļ napasadūdu. Kaut kas manī vēļ gryb tikt pi vuorda. Pogolmūs vēļ esi kū pazaudiejis. Tu atīsi pakaļ. Es tai nadūmoju. Es tū zynu. Kai kotru godu atīt jauns pavasars, kai kotru pavasara reitu agri lāc saule. Kai kotru vīneigū gaida. Es itūreiz pogolmūs rokstu ar sirds vīnkuoršeibu i patīsumu. Tūmār ir lītys, kurys vuordim navar pīraksteit. Jei vīnkuorši ir. Tai ari jei ir beidzūt atguojuse pi manis. I es vēļ napasadūdu.

Kalenders

Jun
19
Cat
06:45 Pasuokums “FIZISKAIS RŪBEŽS: kul...
Pasuokums “FIZISKAIS RŪBEŽS: kul...
Jun 19 @ 06:45 – 18:45
Pasuokums "FIZISKAIS RŪBEŽS: kulturys nūzeime i pīejameiba Latvejis austrumu regionā"
Latgolys muokslys i kulturys platforma MUD LAB aicynoj iz storpdisciplinaru pasuokumu FIZISKAIS RŪBEŽS, kas nūtiks Leivuonā ituo gods 19. junī, daudzfunkcionaluo jaunīšu iniciativu centra “Kvartāls” futbola laukumā i Leivuon dzeļžaceļa stacejā. Pasuokums, kurā pīsadaleis kai[...]
18:00 Seminars “Viesturis olūtu komple... @ Kruoslovys nūvoda muzejs
Seminars “Viesturis olūtu komple... @ Kruoslovys nūvoda muzejs
Jun 19 @ 18:00
Seminars "Viesturis olūtu kompleksuo izpiete: mutvuordu viesturis olūti i fotografejis" @ Kruoslovys nūvoda muzejs
19. junī 18.00 stuņdēs Kruoslovys nūvoda muzejā nūtiks seminars “Viesturis olūtu kompleksuo izpiete: mutvuordu viesturis olūti i fotografejis”.
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Jun 19 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]