Šudiņ – 7. majā – Juoņs Gleizds svynātu dzimšonys dīnu. Deļ tuo par pīmini fotografam, ari LaKuGys skaiteituoji virtuali var īsavērt Juoņa Gleizda kruosu pasaulī. Kūšys kruosys, sova tehnika i nūgiutys eipašys šaļts.

Par Juoni Gleizdu:

Muokslenīks dzims 1924. goda 7. majā natuoļ nu Rēzeknis – Ilziskolna pogosta Vacgailumūs. Ar fotografeju nūsadorbuojs nu 1951. goda. 1952. godā pabeidzs kombinata „Muoksla” foto kursus. Nu 1952. leidz 1994. godam struoduoja Latvejis Traumatologejis i Ortopedejis zynuotniskuos pietnīceibys institutā kai fotografs muokslenīks.

Vysvaira Juoņs Gleizds struoduoja malnboltajā fotografejā, meistareigi izmontojūt sarežgeitū izohelejis tehniku. Īspiejams, vysvaira zynomys ir Gleizda sīvīšu aktu kartenis, nu jis dorbojīs ari cytūs žanrūs – peizažā, klusajā dobā, portretu fotografejā.

24 godu vacumā fotografu pīmeklieja lela nalaime – piec smogim apsaļdiejumim jam tyka amputātys obejis rūkys. Muokslenīka dzeive i radūšais myužs vysā tuo garumā beja grybysspāka i dzeivis spara aplīcynuojums.

2010. goda 17. aprelī Juoni Gleizdu myužeibā pavadeja juo sīva Annele Gleizda, kas fotografam ar gūdu i cīņu paleidzēja nest dzeivis gryutumu i slavis panuokumus.

Kartenis – Edeite Husare/LaKuGa