Dreiži Muotis dīna i gon bārni, gon pīaugušī rauga saryupēt puorsteigumus sovom mamom. Ari dzīduotuoja Guntra ir pasaryupiejuse par skaneigu dzīsmi, kurū veļtej vysom muotem pateiceibā par jūs sirsneigumu, izpaleidzeigumu i ryupem, kū mamys veļtej sovim bārnim.

Dzīsme saucās “Muotis laime”. Dzīsmis vuordu autors ir Ontons Rupaiņs, kas ir Guntrys dzimtuo Bieržgaļs nūvodnīks, nu muzyku sarakstiejs i kūpā ar Guntru aranžiejs Ingars Gusāns (Sovvaļnīks).

Lels paļdis nu Guntrys par klipa taiseišonu Mārim Justam i sātystāvam Pīteram Gailumam.

Guntra (Guntra Kuzmina) leluoku atpazeistameibu īgive kūpā ar grupu “Borowa Mc” – eipaši dzīsmi “Vysskaistuokai meitinei”, apburūt klauseituojus ar sovu skaistū bolsu. Taipat Guntra ir vokalūs ansambļu “Pērlis”  i “Knifs” vadeituoja, dorbojās Rēzeknis vokalajā grupā, kai ari pīsadola cytūs projektūs i izastuoj kai solo muokslineica. Guntra ir profesionala dzīduotuoja, dzīduošonys vuiceibu apgivuse Jāzepa Vītola Latvejis Muzykys akademejā.

Karteņā – Guntra Kuzmina, foto Aldis Krūmiņš.

.