Inta Nagla. Kod maja pučeitis zīd…

Inta Nagla. Kod maja pučeitis zīd…
Ar Intu Naglu LaKuGā īsapazynom napaseņ i niu pīduovojom īspieju puorskaiteit pavysam jaunys Intys ailis. Par autori skaiti ITE.

 .
Nabyus nikod

Šūnakt kai trokys
Pūgoj laksteigolys,
Īvu boltajūs snīgūs
Sasapynuš.

Tu soki,
Ka maņ vēļ juogaida.
Ka nav pīnuocs eistais laiks,
Lai mes sasatiktu.

Bet kas zina,
Kod byus tys eistais???

Tod, kod snīgs
Zaltainuos lopys rudinī
Voi bolti snīgi
Juks vysūs viejūs?

Kod?

Es stuovu iz slīkšņa:
Dabasu durovuos
Speid opols mieness,
I kai jukuš
Dzīž laksteigolys.

Sirdī bezgaleigs tukšums.

Zynu-
Ka nabyus nikod
Tev laika
Ar mani sasatikt…

*****

Kū dareit?

Šaļtim pīduovuojums ir,
Bet pīprasejuma nav.

Īplaisuojušus traukus
Parosti sasit
Da gola
I izmat –
Soka: jī nalaimi nasūt.

Bet kū dareit,
Ka sirds plaisoj
Nu vysom pusem –
Jū ari izmest?

Bet kur byus jimt cytys?

Nav taida veikala,
Kur puordūtu jaunys sirys,
I remonta darbneicas
Tože nav,
Kas aizleimētu plaisys.

Pīprasejums ir,
Bet pīduovuojuma nav…

*****

Lai jau!

Maja vabalis
Šuvokor naadekvatys.

Kod suok jau tymst,
Juos lein
Nu vysom šķierbom uorā
I izsuok sovys izlidojumus.

Bzzzz – bums: pret sātys sīnu!
Bzzzz – bums: pret vacū stobu!
A cytys sareikuojuš
Skeitborda trasi
Pa munu austū pakluojeņu,
Kas iz auklys vēļ koltuos
( Eistuok – gon mierkst
Vokora rosā).

Jau tymst,
Bet es vēļ siežu puču dūbī,
Koļem vīna vabale
Maņ gondreiž aiz apaklis aizkreit:
Kū tu dulnom padareisi!

A vokors tik šmuks:
Lokstugaili tai pūgoj, tai pūgoj,
Ka sirds nu prīcys puori īt
Kai taida putojūša bārzsulu kruška,
Tik tuos vabalis…

Da lai!
Cik jau juom tuos prīcys –
Viņ pavasars,
Lai jau laižās, sytās, ruopoj
I slidinojās –
Pavasarī tok vysi
Drupeit dulnuoki palīk…

*****

Kod maja pučeitis zīd…

Sasatiksimēs
Iz maja pučeišu stigys.
Tu tikai ej
Bosom kuojom
I pliku golvu,
Lai vieji aizskoloj
Vysys skumis,
Lai sirdī viņ prīca
Kai zili maja dabasi
Puori golvai pleivoj…

…Tu nasajiemi munu viestuli –
Tū, ar dzaltanūs purynu zeigeli?
A es Tevi gaidieju vysu dīnu
I nasaprotu,
Deļ kam Tu naej…

Vokors
Kotrā maja pučeitis zīdeņā
Īlyka rosys lāseiti –
Juos niu speid
Kai juoņa tuorpeni spūdri…

Es Tevi gaidieju,
Leidz nūsola bosuos kuojis
I nakts taurini saleida motūs –
Tod saprotu,
Ka naatīsi
Ni šūvokor,
Ni cytā majā,
Naatīsi pa meža stygu,
Kod boltuos maja pučeitis zīd…

 

Print Friendly, PDF & Email

Komentari