Latvīšu Dzīšmu svātku tradicejis suokys meklejamys 1864. godā Dikļūs, kod ar latvīšu rakstnīka, kulturys darbinīka i luteraņu bazneickunga Jura Neikena ryupem trešajūs Vosoryssvātkūs tyka organizāti pyrmī latvīšu sasadzīduošonys svātki. Nu suoku J. Neikens nūtikšonu asūt īceriejs kai prostu koncertu slāgtuos ustobuos, nu, kod izaruodiejs, ka Dikļūs i tūs apleicīnē itaida veida pasuocīnim nav pīmāruotu ustobu, koncerts tyka organizāts bazneickunga muižys duorzā zam klaju dabasu, kas sasadzīduošonai daškeirs eipašu auru, reizē līkūt pamatus vīnai nu rakstureiguokajom latvīšu kūpeibys gora izpausmem – dzīšmu i dzygu svātkim, kas sovu aktualumu nav zaudiejuši da myusu dīnom.

2013. goda tiks atzeimuoti jau XXV Vyspuorejī Dzīšmu i XV Dzygu svātki, kas nūtiks Reigā, nu jau itymā godā vysi Latvejis regioni aicynoj iz svātku īskandynuošonys koncertim. Ivars Cinkuss, Vyspuorejūs latvīšu dzīšmu i XV Dzigu svātku nūslāguma koncertu muokslenīciskais vadeituojs, nūruoda „Ituo goda koncerti ir cīši byutisks pūsms ceļā iz 2013. goda Dzīšmu i dzygu svātkim. Īskonu koncertūs dzīduotuojim eistyn atsajaunoj kūpeibys sajiuta. Tei ir šaļts, kod kuoristi pagrīž byutu i sirdi pret cyta goda sasatykšonu Mežaparkā. Īskonu koncertūs puorbaudeisim cytu Svātku muzykaluos īceris – repertuaru, dzīšmu parādu, pavadejumu. Tiks īskicāti ari režejis i scenografejis rysynuojumi, kab 2013. godā iz Svātkim var īt drūsai i augši pacaltu golvu.”

Pyrmī Dzīšmu i dzygu svātku īskandynuošonys koncerti byus 26. majā Saldū (Kūrzemis regionam) i Preiļūs (Latgolys regionam). Svātku nūtykšona Preiļūs suoksīs 11:00 ar Gareiguos muzyks koncertu Preiļu katuoļu bazneicā i turpynuosīs 18:00 ar kuoristu sasadzīduošonu Preiļu piļsātys estradē, iz kurū sabrauks vaira kai 1000 kuoristu nu vysa regiona. Koncerta programu boguotynuos Preiļu nūvoda deju kolektivi „Gaida”, „Dancari” i „Talderi”, kai ari folklorys kūpa „Rūtoj”. Preiļu koncerta režisors – Viesturs Rencis, muokslenīciskais vadeituojs – Jevgenijs Ustinskovs, viersdirigenti – Terēzija Broka, Anda Lipska, Jevgenijs Ustinskovs, Roberts Liepiņš, Edgars Znutiņš i c. Īeja iz koncertu bez moksys.

Dzīšmu svātku īskandynuošonys nūtikšonu sereja turpynuosīs 2. junī Cāsu piļs parka estradē Vydzemis Dzīšmu svātkūs i 7. julī Elejis piļs parkā Zemgalis regiona kuoru sasadzīduošonā.
Dzīšmu svātku īskonu koncertus reikoj Kulturizgleiteibys i namaterialuo montuojuma centrs i Dzīšmu svātku bīdreiba sadarbeibā ar nūvodu pašvaļdeibom.

Sagatavieja Agnese Poikāne, Daugovpiļs Universitatis studente