Kinys režisors i projekta idejis autors Edgars Blinovs, kas ir ari kinys „Latgolys Laikadečs” (2011) režisors, soka: „Asam veiksmeigi izsuokuši taiseit pyrmūs kinys kadrus. Vyss nūteik piec plana. Dorba grupa i atlaseitī akteri ir disciplināti, punktuali i ar nūpītnu attīksmi pret doromū dorbu. Kinys laukumā scenarejā pīraksteitais puortūpa par vizuali apsaveramū. Prīcej, ka idejis izjimt myusdīnu dramu par Latgolu, pīsapiļda, nu itei vosora myusim byus korsta, eipaša, vīna iz vysu…”

Režisors i juo komanda par golvonūs lūmu spālātuojim kinā izavielejuši gon Latgolā zynomus ļauds, gon davuši īspieju sevi paruodeit ari jaunim talantim. Golvonuos lūmys spēlēs Daila Ekimāne, Diāna Bernāne, Ilmārs Dreļs, Andrejs Rudzinskis, Gunta Sidorova i c.

Kinys taiseituoji ar „Vīna vosora deļ vysu” paleidzeibu gryb dagrīzt viereibys kai ba vīnkuoršom, pošsaprūtamom lītom, kuruos skar kotru Latgolys sātu, kotru Latgolys īdzeivuotuoju.

Eistynojūt itū projektu, teik popularizāta Latgolys kulturvide, tradicejis i latgalīšu volūda vītejā, nacionalā i straptautiskā leiminī, tiek dagrīzta viereiba asūšajai situacejai Latgolā, gon dokumentejūt tū, gon pīduovojūt sovu viertejumu vysā, kas nūteik pošu reizi tipiskā latgalīšu sātā, saimē, situacejuos.

Kinys topšonu atbolsta Rēzeknis piļsātys dūme (Mozūs kulturys projektu konkurss), Rēzeknis piļsātys dūmis Socialuo puorvaļde, „Youth in Action”, Duobelis patmaļnīks.

Kinys taiseituoji – Latgolys entuziastu grupa – aicynoj Latgolys izjiemiejus, pošvaļdeibys i cytus interesentus napalikt vīnaldzeigim i atbaļsteit itū vierīneigū projektu. Kurs gon cyts, ka na mes – kurī asam ite, dzeivojom sovu dzeivi i taisom itū vītu taidu, kaida tei ir, pastuosteit lobuok cytim par myusim?

Vosora var byut prosta vosora – saulaina, bez bādom. Nu var byut ari cytaiža – dažaidu nūtikšonu pīpiļdeita, mutuļojūša, darbeiga i pīmiņā i viesturē palīkūša, taida, kurymā koč kas rūnās.

Informaceju sagatavieja Laura Sondore, kinys „Vīna vosora deļ vysu” i Latgolys entuziastu grupys sabīdriskūs vaicuojumu specialiste