Latgalīšu rokstu volūdys vosorys školā aicynuoti pīsadaleit Latgolys kulturys īstuožu, biblioteku, školu, nūvodu pošvaļdeibu darbinīki, školuotuoji, žurnalisti, studenti i cyti interesenti – potencialī latgalisku rokstu par regiona kulturys dzeivi raksteituoji portalam Latgalīšu Kulturys gazeta www.lakuga.lv, regionalajim medejim i nūvodu sātyslopom.

Vosorys škola nūtiks cīši šmukā i kulturviesturiski eipašā vītā – Vileks nūvoda Škilbanu pogosta Balkanūs i tymā pīsadaleit varēs 20-25 grybātuoji nu 18 godu vacuma.

Vosorys školā kotru dīnu paradzātys latgalīšu rokstu volūdys nūdarbeibys, kab apgiutu myusdīnu latgalīšu rokstu volūdu piec 2007. godā LR Tīslītu ministrejis Vaļsts volūdys centrā pījimtim latgalīšu rokstu volūdys nūsacejumim. Taipat byus žurnalistikys pamatu, nūtikšonu fotografiešonys pamatu, nūvodpietnīceibys i myusdīnu socialūs teiklu izmontuošonys pamatu nūdarbeibys, kab veiksmeiguok i interesantuok sagataveitu i popularizātu rokstus par nūtikšonom Latgolā. Vokorūs paradzātys latgaliskys aktivitatis i kulturys programa ar doncuošonu, dzīduošonu, teatra spieļuošonu i cytom izdareibom, kab styprynuotu latgaliskū apziņu i veicynuotu sadarbeibu latgaliski rokstūšys komandys taiseišonā.

Vosorys školu reikoj bīdreiba „Latgolys Studentu centrs” i latgalīšu kulturys gazeta www.lakuga.lv ar LR Kulturys ministrejis i Vaļsts Kulturkapitala fonda Latgolys kulturys programys atbolstu.

Daleibys moksa seminarā vīnam dalinīkam ir 12 lati. Seminara reikuotuoji sadz lektoru, aktivitašu, vosorys školu ustobu nūmys i dalieji izturiešonys izdavumus.

Kab pīsadaleitu vosorys školā, da 5. juļam juopadora diveji sātys aizdavumi:

1) Juoaizpiļda i iz info@lakuga.lv juoatsyuta ROKSTI! Dasacejuma anketa

2) Juosagatavej roksts, interveja, foto reportaža ci cyta veida materials par regiona, nūvoda kulturys, viesturis nūtikšonu, īvārojamu personeibu, kolektivu, problemvaicuojumu ci cytu LaKuGys tematikai atbylstūšu temu (ar atļuovi publicēt sagataveitū materialu LaKuGā). Roksts juoīsnīdz latgaliski (nasabeistit par klaidom!), rokstu zeimu skaits vysmoz 2000 zeimis.

Breidynojam, ka vosorys školā „ROKSTI!” juobyut gotovam daudzi vuiceitīs, struoduot komandā, izzinuot daudzi jaunys informacejis, juobyut gotovam byut aktivam, draudzeigam, drupeit trokam i apsazynuot sovu latgaliskuos raksteišonys miseju ari iz prīšku piec vosorys školys beigu.

Par daleibys apstiprynuojumu vosorys školai informēsim da 10. juļa. Dalinīku atlasē tiks jimta vārā motivaceja i īsnīgtais roksts.

Vaira dazynuošonys, vaicuojumim i cytim gadejumim raksteit info@lakuga.lv ci zvaneit 29509672 (Edeite).

Mes vysi jādzam latgaliski runuot, nu raksteit… „kai muoku, tai rokstu”, „najādzu pareizi, deļ tuo narokstu”, „nivīns taipat latgaliski naskaita” – aizabyldynojam ar itom i vysaidom cytaidom vainem. Mes aicynojam ituos vainis likt pi molys i sokom „ROKSTI!”. Tik par vysim kūpā mes varam radeit na viņ runuotuos, nu ari latgaliski raksteituos informacejis telpu. Seņuok latgalīšim beja nazcik gazetu, kas izguoja vairuokys reizis nedeļā, nu niu ir viņ labi, ka puora tematiskys rubrikys regionalajuos gazetuos, sadalis regiona īstuožu sātys lopuos, puora dīnroksti, organizaceju sātyslopys i vīna kulturys gazeta škārsteiklā. Deļ tuo caram, ka vosorys škola „ROKSTI!” varātu byut pyrmais sūleits iz koč drupeit latgaliskuoku raksteituotuos informacejis telpu iz prīšku.